«قازاۆتوجول» ۇلتتىق كومپانياسى «استانا – قاراعاندى – الماتى» باعىتىنداعى اۆتوجولدا جىلدامدىقتى باقىلايتىن ارنايى قۇرالدار ورناتىلىپ جاتقانىن مالىمدەدى. بۇل جول قاۋىپسىزدىگىن ارتتىرۋ جانە ءتارتىپ بۇزۋشىلىقتىڭ الدىن الۋ ماقساتىندا قولعا الىنعان شارا. ايتا كەتەيىك، وسى تاسجولدا جەتى ادام قازا تاپقان ەدى، دەپ حابارلايدى Dalanews.kz.

كومپانيا جۇرگىزۋشىلەرگە جولدا جوندەۋ جۇمىستارى جۇرگىزىلىپ جاتقان ۋچاسكەلەردە جىلدامدىقتى تومەندەتۋ قاجەتتىگىن قاتاڭ ەسكەرتتى.

«جوندەۋ اۋماقتارىندا 90، 70، 50 جانە 20 كم/ساع شەكتەۋلەرىن كورسەتەتىن بەلگىلەر، سونداي-اق باسىپ وزۋعا تىيىم سالاتىن جانە جوندەۋ تۋرالى الدىن الا ەسكەرتەتىن جول بەلگىلەرى قويىلعان»، – دەپ حابارلادى «قازاۆتوجول» باسپا ءسوز قىزمەتى.

الايدا كومپانيا جۇرگىزۋشىلەردىڭ كەيبىرى جول ەرەجەلەرىن ساقتامايتىنىن ايتىپ، دابىل قاعۋدا. ولاردىڭ اراسىندا جىلدامدىقتى اسىرعان، تىيىم سالىنعان اۋماقتارعا كىرىپ كەتكەن جانە جوندەۋ ايماعىندا باسىپ وزۋعا تىرىسقاندار دا بار. مۇنداي ارەكەتتەر تەك ءوز ومىرىنە ەمەس، جول جوندەۋ جۇمىستارىنا قاتىسىپ جاتقان مامانداردىڭ قاۋىپسىزدىگىنە دە قاتەر توندىرەدى.

«قازاۆتوجول» جۇرگىزۋشىلەردىڭ سالعىرتتىعىنىڭ ناقتى مىسالى رەتىندە جەتى ادامنىڭ ءومىرىن جالماعان ءىرى جول اپاتى تۋرالى مالىمەت تاراتتى.

«وكىنىشكە قاراي، الدىن الا مالىمەتكە سايكەس، 454-شاقىرىمدا جول بەلگىلەرى مەن تاڭبالارىن ساقتاماۋ سالدارىنان اپات ورىن الدى. بۇل جول-كولىك وقيعاسى جەتى ادامنىڭ ولىمىنە الىپ كەلدى»، – دەپ جازىلعان رەسمي حابارلامادا.

قايعىلى وقيعا 6 شىلدە كۇنى قاراعاندى وبلىسىنىڭ اقشاتاۋ كەنتى ماڭىندا بولعان. Kia Sedona اۆتوكولىگىنىڭ جۇرگىزۋشىسى بالقاش قالاسىنا بارا جاتقاندا، جول بەلگىلەرىن ەلەمەي، الدا كەلە جاتقان كولىكتەردى باسىپ وزۋعا تىرىسىپ، جوندەۋ جۇمىستارى ءجۇرىپ جاتقان ۋچاسكەگە شىعىپ كەتكەن.

سالدارىنان كولىك اپاتقا ۇشىراپ، ورتەنىپ كەتكەن. 7 ادام وقيعا ورنىندا كوز جۇمىپ، جۇرگىزۋشى مەن تاعى ءبىر جولاۋشى اۋرۋحاناعا جەتكىزىلگەن.

قاراعاندى وبلىستىق پوليسيا دەپارتامەنتىنىڭ باسشىسى ازامات احمەتوۆتىڭ ايتۋىنشا، بۇل فاكتى بويىنشا قىلمىستىق ءىس قوزعالىپ، قاجەتتى ساراپتامالار تاعايىندالعان. قازىرگى ۋاقىتتا وقيعانىڭ بارلىق ءمان-جايى انىقتالىپ جاتىر.

«قازاۆتوجول» جۇرگىزۋشىلەردى جول قوزعالىسى ەرەجەلەرىن قاتاڭ ساقتاپ، جولدا بارىنشا مۇقيات بولۋعا جانە ءتارتىپتى ۇستانۋعا شاقىردى. 

«ءبىر ساتتىك جاۋاپسىزدىق ادام ومىرىنە ءقاۋىپ ءتوندىرۋى مۇمكىن. ءار جۇرگىزۋشى جولدا تەك ءوز ومىرىنە ەمەس، اينالاسىنداعى ادامدارعا دا جاۋاپتى ەكەنىن ۇمىتپاۋى كەرەك»، – دەيدى كومپانيا وكىلدەرى.