«QazAvtoJol» ulttyq kompaniiasy «Astana – Qaraǵandy – Almaty» baǵytyndaǵy avtojolda jyldamdyqty baqylaityn arnaiy quraldar ornatylyp jatqanyn málimdedi. Bul jol qaýipsizdigin arttyrý jáne tártip buzýshylyqtyń aldyn alý maqsatynda qolǵa alynǵan shara. Aita keteiik, osy tasjolda jeti adam qaza tapqan edi, dep habarlaidy Dalanews.kz.
Kompaniia júrgizýshilerge jolda jóndeý jumystary júrgizilip jatqan ýchaskelerde jyldamdyqty tómendetý qajettigin qatań eskertti.
«Jóndeý aýmaqtarynda 90, 70, 50 jáne 20 km/saǵ shekteýlerin kórsetetin belgiler, sondai-aq basyp ozýǵa tyiym salatyn jáne jóndeý týraly aldyn ala eskertetin jol belgileri qoiylǵan», – dep habarlady «QazAvtoJol» baspasóz qyzmeti.
Alaida kompaniia júrgizýshilerdiń keibiri jol erejelerin saqtamaitynyn aityp, dabyl qaǵýda. Olardyń arasynda jyldamdyqty asyrǵan, tyiym salynǵan aýmaqtarǵa kirip ketken jáne jóndeý aimaǵynda basyp ozýǵa tyrysqandar da bar. Mundai áreketter tek óz ómirine emes, jol jóndeý jumystaryna qatysyp jatqan mamandardyń qaýipsizdigine de qater tóndiredi.
«QazAvtoJol» júrgizýshilerdiń salǵyrttyǵynyń naqty mysaly retinde jeti adamnyń ómirin jalmaǵan iri jol apaty týraly málimet taratty.
«Ókinishke qarai, aldyn ala málimetke sáikes, 454-shaqyrymda jol belgileri men tańbalaryn saqtamaý saldarynan apat oryn aldy. Bul jol-kólik oqiǵasy jeti adamnyń ólimine alyp keldi», – dep jazylǵan resmi habarlamada.
Qaiǵyly oqiǵa 6 shilde kúni Qaraǵandy oblysynyń Aqshataý kenti mańynda bolǵan. Kia Sedona avtokóliginiń júrgizýshisi Balqash qalasyna bara jatqanda, jol belgilerin elemei, alda kele jatqan kólikterdi basyp ozýǵa tyrysyp, jóndeý jumystary júrip jatqan ýchaskege shyǵyp ketken.
Saldarynan kólik apatqa ushyrap, órtenip ketken. 7 adam oqiǵa ornynda kóz jumyp, júrgizýshi men taǵy bir jolaýshy aýrýhanaǵa jetkizilgen.
Qaraǵandy oblystyq politsiia departamentiniń basshysy Azamat Ahmetovtiń aitýynsha, bul fakti boiynsha qylmystyq is qozǵalyp, qajetti saraptamalar taǵaiyndalǵan. Qazirgi ýaqytta oqiǵanyń barlyq mán-jaiy anyqtalyp jatyr.
«QazAvtoJol» júrgizýshilerdi jol qozǵalysy erejelerin qatań saqtap, jolda barynsha muqiiat bolýǵa jáne tártipti ustanýǵa shaqyrdy.
«Bir sáttik jaýapsyzdyq adam ómirine qaýip tóndirýi múmkin. Ár júrgizýshi jolda tek óz ómirine emes, ainalasyndaǵy adamdarǵa da jaýapty ekenin umytpaýy kerek», – deidi kompaniia ókilderi.
