قاراعاندى وبلىسىندا اۋا رايىنىڭ قولايسىزدىعى، اسىرەسە بوران مەن كوكتايعاق، كولىك قوزعالىسىنا ۇلكەن كەدەرگى كەلتىردى. استانا مەن الماتى باعىتتارى دا جابىق جول ۋچاسكەلەرىنىڭ قاتارىنا ەنگەن، دەپ حابارلايدى Dalanews.kz.
وبلىستىق پوليسيا دەپارتامەنتىنىڭ حابارلاۋىنشا، وڭىردە التى جول ۋچاسكەسى ءالى دە جابىق. سول جەرلەردە 1418 كولىك قالىپ قويعان، ولاردىڭ ىشىندە:
- 508 جەڭىل اۆتوكولىك،
- 900 جۇك كولىگى،
- 10 اۆتوبۋس.
بۇل كولىكتەردە جالپى سانى 2924 ادام بولعان.
"جولدا قالعان جۇرگىزۋشىلەر مەن جولاۋشىلارعا قاجەتتى بارلىق كومەك كورسەتىلۋدە. ولارعا ىستىق تاماق پەن اۋىزسۋ بەرىلىپ جاتىر. قاجەت بولعان جاعدايدا جىلىتۋ ورىندارىنا نەمەسە تۇنەيتىن جەرلەرگە جەتكىزىلەدى. قازىرگى ۋاقىتتا جول بويىنداعى ءدامحانالار، مەشىتتەر مەن ينتەرناتتاردا 144 ادام ورنالاستىرىلدى"، – دەپ مالىمدەدى دەپارتامەنت وكىلدەرى.
سونداي-اق قولايسىز اۋا رايىنا بايلانىستى جول پوليسياسى كۇشەيتىلگەن رەجيمدە جۇمىس اتقارۋدا. وبلىستاعى جولداردا 35 اۆتوپاترۋل مەن 74 پوليسيا قىزمەتكەرى كەزەكشىلىك ەتۋدە.
