بۇگىن شاحماتتان كادەتتەر اراسىنداعى الەم چەمپيوناتىنىڭ 380 قاتىسۋشىسى بيىك تاۋلى شىمبۇلاق كۋرورتىن يمپروۆيزاسيا ساحناسىنا اينالدىردى: شەتەلدىك سپورتشىلار ايگىلى قازاق ءبيى «قارا جورعانى» بيلەدى. قار جامىلعان تاۋلار اياسىنداعى بي شەڭبەرى دەمالىس كۇنىنىڭ جارقىن اكسەنتىنە جانە قوناقتار مەن قابىلداۋشى ەل اراسىنداعى شىنايى مادەني كوپىرگە اينالدى، دەپ حابارلايدى Dalanews.kz
اسىرەسە زيمبابۆە كومانداسى ءۇشىن قارمەن العاشقى كەزدەسۋ ەرەكشە اسەرلى ءسات بولدى. دەلەگاسيا جەتەكشىسى دوكتور ميكوتي مەرسي مۋشانگۆە ءوز اسەرىمەن ءبولىستى:
«ءبىز قازاقستانعا العاش رەت كەلىپ وتىرمىز. وسىنداي كەرەمەت چەمپيوناتتى ۇيىمداستىرعاندارىڭىز ءۇشىن راحمەت. بىزگە الماتى قالاسى وتە ۇنادى – ول ادەمى، جاسىل ءارى قوناقجاي ەكەن. بۇگىن شىمبۇلاقتا بالالارىمىز قاردى العاش رەت كوردى. ويتكەنى ءبىز ىستىق ەلدە تۇرامىز جانە ونى ۇستاپ كورۋدى ارماندايتىنبىز، ال بۇگىن بالالار ءتىپتى قار اتىسىپ تا وينادى».
ءتۋرنيردىڭ ەكۆاتورىنداعى چەمپيونات
بۇل ۋاقىتتا الماتىدا، بالۋان شولاق اتىنداعى سكك ارەناسىندا، FIDE World Cadet Chess Championships 2025 جالعاسۋدا. التى تۋر وينالدى – جولدىڭ جارتىسىنان وتتىك. مەدال ءۇشىن كۇرەسكە 88 ەلدەن كەلگەن 842 جاس شاحماتشى قاتىسۋدا: 8، 10 جانە 12 جاسقا دەيىنگى ۇلدار (Open) مەن قىزدار (Girls) ساناتىندا.
قازاقستان رەكورد ورناتتى: ەلدىڭ بارلىق 20 وڭىرىنەن 229 ويىنشى قاتىسىپ وتىر. قاتىسۋشىلار سانى بويىنشا الماتى كوش باستاپ تۇر – 86، ودان كەيىن استانا – 47.
نەگىزگى ساناتتارداعى ارالىق ناتيجەلەر:
- G8 – اليشا بيسالييەۆا (قازاقستان) 6 ۇپايمەن كوش باستاپ تۇر.
- O8 – 100%-دىق ناتيجەنى ۆان يۋيسيۋان (جۇڭگو) كورسەتىپ كەلەدى، قازاقستاندىق ءادينۇر ادىلبەك 5½ ۇپايمەن ەكىنشى ورىندا.
- G10 – الدا WCM چينزوريگ نانديندجيگۋۋر (موڭعوليا)، قازاقستاندىق ميلانا فيليپپوۆا مەن ادەلينا نۇرحان قىزىنىڭ سايكەسىنشە 4½ جانە 4 ۇپايى بار.
- O10 – ۇندىلىك AFM ماني ساربارتو كوش باستاپ تۇر (6)، جەتى قازاقستاندىق قۋعىنشىلار توبىندا.
- G12 – امەريكالىق WFM لوري كيۋ 6 ۇپاي جينادى.
- O12 – كوشباسشىلار قاتارىندا الماتىلىق CM دانيس قۋاندىق ۇلى جانە تۇرىك سپورتشىسى الي پويراز ۋزدەمير – 5½ ۇپايدان.
ەرتەڭ قاتىسۋشىلار 7ء-شى تۋرعا شىعادى، وندا العاشقى ناقتى مەدال ۇمىتكەرلەرى انىقتالماق.
ءتۋرنيردىڭ رەسمي سەرىكتەستەرى: Sense Robot، سپورتتىق نىساندار ديرەكسياسى، «بالۋان شولاق» ارەناسى، Best Service، Primus Capital، Shymbulak Water، Air Astana اۋە كومپانياسى، Almaty Tourism Bureau جانە الماتى حالىقارالىق اۋەجايى.
اقپاراتتىق قولداۋ كورسەتكەندەر: DKNews، «كۋرسيۆ»، «ەۋرازيا» ءبىرىنشى ارناسى، «7 ارنا»، «مير» ترك، «قازسپورت»، «الماتى» تەلەارناسى، Astana TV، Toppress، Dala News، Ult.kz، Today Info، Zakon.kz، ChessBase، Lichess.org، «چەسسنو گوۆوريا» تەلەگرام-ارناسى، Qalam Balam، ChessBase India جانە Sport Plus.
دومبىرا ۇنىمەن ورىندالعان «قارا جورعا» ءبيى مەن العاشقى قاردى كورىپ قۋانعان قاتىسۋشىلار ءۇشىن ۇمىتىلماس كۇن سىيلاپ، قازاقستاننىڭ قوناقجايلىعىن تاعى دا ايشىقتاپ بەردى.
