12 قاراشا كۇنى قازاقستاننىڭ باسىم بولىگىندە قولايسىز اۋا رايى كۇتىلەدى. "قازگيدرومەت" ماماندارى ءبىرقاتار ايماققا داۋىلدى ەسكەرتۋ جاريالادى. كوپتەگەن وڭىردە قار مەن جاڭبىر جاۋىپ، كوكتايعاق، بۇرقاسىن جانە تۇمان بايقالادى. كەي جەرلەردە جەلدىڭ جىلدامدىعى سەكۋندىنا 20-25 مەترگە دەيىن كۇشەيۋى مۇمكىن، دەپ حابارلايدى Dalanews.kz. 

استانا قالاسىندا تۇندە جانە تاڭەرتەڭ كوكتايعاق بولادى. وڭتۇستىك-باتىستان سوققان جەل كەيىنىرەك سولتۇستىك-باتىس جانە باتىس باعىتقا اۋىسىپ، ەكپىنى 15–20 م/س دەيىن جەتەدى.

اباي وبلىسىندا تۇنگى جانە كۇندىزگى ۋاقىتتا جاڭبىر مەن قار ارالاس جاۋىن-شاشىن كۇتىلەدى. وڭتۇستىك پەن شىعىستا تۇمان ءتۇسىپ، كەي جەرلەردە كوكتايعاق پەن بۇرقاسىن بايقالادى. جەلدىڭ جىلدامدىعى 15–25 م/س شاماسىندا بولادى.

اقتوبە وبلىسىندا تۇندە جانە تاڭەرتەڭ سولتۇستىك پەن باتىس ايماقتاردا تۇمان تۇسەدى.

اقمولا وبلىسىندا ارالاس جاۋىن-شاشىن، كوكتايعاق جانە بۇرقاسىن كۇتىلەدى. باتىس پەن وڭتۇستىكتە تۇمان بولادى. جەل باعىتىن وڭتۇستىك-باتىستان سولتۇستىك-باتىسقا اۋىستىرىپ، 15–20 م/س جىلدامدىقپەن سوعادى.

الماتى وبلىسىندا جەل كۇشەيىپ، ونىڭ ەكپىنى سولتۇستىك جانە وڭتۇستىك وڭىرلەردە 15–20 م/س دەيىن جەتەدى.

شىعىس قازاقستان وبلىسىندا جاڭبىر مەن قار، كوكتايعاق جانە بۇرقاسىن بولجانعان. تۇندە جانە تاڭەرتەڭ تۇمان تۇسەدى. جەلدىڭ كۇشى 15–25 م/س دەيىن جەتۋى ىقتيمال.

جامبىل وبلىسىندا تۇندە جانە تاڭەرتەڭ، اسىرەسە تاۋلى اۋدانداردا تۇمان تۇسەدى. تاۋلى ايماقتاردا جەلدىڭ ەكپىنى 15–20 م/س شاماسىندا بولادى.

جەتىسۋ وبلىسىندا شىعىس باعىتتاعى جەلدىڭ جىلدامدىعى 17–22 م/س دەيىن كۇشەيەدى.

باتىس قازاقستان وبلىسىندا تۇندە جانە تاڭەرتەڭ تۇمان كۇتىلەدى.

قاراعاندى وبلىسىندا جاڭبىر مەن قار ارالاس جاۋىن-شاشىن، كوكتايعاق جانە بۇرقاسىن بولجانعان. جەلدىڭ ەكپىنى 15–20 م/س.

قوستاناي وبلىسىندا تاۋلىك بويى جاڭبىر مەن قار جاۋىپ، كوكتايعاق پەن بۇرقاسىن ورىن الادى. تۇندە جانە تاڭەرتەڭ تۇمان ءتۇسۋى ىقتيمال.

قىزىلوردا وبلىسىندا سولتۇستىك جانە ورتالىق ايماقتاردا تۇمان تۇسەدى.

ماڭعىستاۋ وبلىسىندا تۇنگى جانە تاڭەرتەڭگى ۋاقىتتا باتىس پەن سولتۇستىكتە تۇمان بايقالادى.

پاۆلودار وبلىسىندا جاڭبىر مەن قار جاۋىپ، كوكتايعاق جانە بۇرقاسىن كۇتىلەدى. جەلدىڭ جىلدامدىعى 15–20 م/س دەيىن جەتەدى.

سولتۇستىك قازاقستان وبلىسىندا دا اۋا رايى تۇراقسىز — قار، جاڭبىر، كوكتايعاق جانە بۇرقاسىن كۇتىلەدى. كەي جەرلەردە تۇمان تۇسەدى.

ۇلىتاۋ وبلىسىندا جاۋىن-شاشىن ارالاس قار، كوكتايعاق پەن بۇرقاسىن بولجانىپ وتىر. جەلدىڭ جىلدامدىعى 15–20 م/س شاماسىندا.

مامانداردىڭ ايتۋىنشا، مۇنداي اۋا رايى جول قوزعالىسىنا قيىندىق تۋدىرىپ، كوممۋنالدىق قىزمەتتەردىڭ جۇمىسىنا اسەر ەتۋى مۇمكىن.