ەلىمىزدىڭ ءبىرقاتار وڭىرلەرىندە قانت قايتادان قات تاۋارعا اينالدى. ايتالىق، اقتوبەنىڭ دۇكەن سورەلەرىندە قورابى مىڭ تەڭگەلىك شاقپاق قانت قانا ساتىلىپ جاتىر. ورالدىقتار شەكەر ءۇشىن ساۋدا ورنىندا ءبىرىن-بىرى تاپتاپ، تاتتىگە تالاسۋدا، – دەپ حابارلايدى كتك ارناسى.

ال ازىق-تۇلىكپەن ەلدى قامتۋعا جاۋاپتى اۋىل شارۋاشىلىعى مينيسترلىگى جاقىن ارادا 150 ۆاگون قانتتى وڭىرلەرگە تاراتىپ بەرەتىنىن ايتتى. وسىلايشا تاپشىلىقتى جويماقشى.

اقتوبە تۇرعىندارى ءۇش كۇننەن بەرى قانت تابا الماي سابىلىپ ءجۇر. اكىمدىكتىڭ تىكەلەي باقىلاۋىنداعى الەۋمەتتىك دۇكەندەردىڭ سورەسى دە بوس. سۋپەرماركەتتەردە قۇمشەكەر ءتورت كۇن بۇرىن بولعان. ول كەزدە كەلىسى 461 تەڭگەدەن ساتىلىپتى. ءقازىر تەك مىڭ تەڭگەلىك قوراپتاعى شاقپاق قانت قانا قالعان.

«ەكى كۇننەن بەرى شەكەر تاپپاي ءجۇرمىن. ءبىراز دۇكەندەرگە باردىم. قىمباتتاپ جاتىر. ءبارى قىمباتتاپ جاتىر، ەكى ەسە، ءۇش ەسەگە. حالىقتىڭ زەينەتاقىسى وتە از، بىزگە قيىن» دەيدى جۇرت.

اقتوبەلىك شەنەۋنىكتەر بولسا تۇرعىندار «قانتتان تاپشىلىق كورمەيدى» دەپ، انت-سۋ ءىشىپ وتىر. ولار دۇكەن سورەلەرىن قۇمشەكەرگە تولتىرىپ، ءار ادامعا ءۇش كەلىدەن ارتىق ساتپاۋدى كوزدەپ وتىر. وسىدان ءبىر اپتا بۇرىن كورشىلەس ورالدا شەنەۋنىكتەر دە ءدال وسىلاي ايتقان ەدى.

ءبىراق ورالدا جۇرت دۇكەندە قانتقا تالاسىپ جاتىر. ورالدا قانت ءۇشىن تۇرعىندار ءبىر-بىرىن تاپتاپ كەتۋگە ءازىر. شەكەردى شەكتەپ ساتقاننىڭ وزىندە، جۇرتتىڭ بارىنە شەكەر جەتپەۋدە. «دۇكەندە قانت جوق. ونى قايدان الامىز؟ نەگە جوق؟ قىمبات بولسا دا، جوق! نەگە قىمباتتاتا بەرەدى قانتتى؟!»، «شەندىلەر «قازاقستاندا ءبارى شىعادى» دەيدى ال بىزدە جوق. الدە قانت ورالدان اينالىپ كەتە مە؟» دەپ قارپايىم حالىق نارازىلىقتارىن ءبىلدىرىپ جاتىر.

بۇرىن قانت كورشىلەس رەسەيدەن تاسىمالداناتىن. ناۋرىزدا ول جاق ءتاتتىنى ەكسپورتتاۋعا تىيىم سالعان. ەندى ەلىمىزدە تەك جامبىل وبلىسىنداعى قوس زاۋىتقا تەلمىرىپ وتىر. ونىڭ ءبىرى جاقىندا عانا ىسكە قوسىلدى. زاۋىتتىڭ وزىندە قانت ءقازىر كەلىسىنە 450 تەڭگەدەن شىعىپ جاتىر. سەبەبى، لاتىن امەريكاسىنان جەتكىزىلەتىن شيكىزات قىمباتتاپتى.

– ەگەر شيكىزات قازاقستان، بولماسا، جانىمىزداعى رەسەيدە بولسا، ونىڭ باعاسىن قاداعالاۋعا مۇمكىندىك بولار ەدى. ەندى بۇل شيكىزات لاتىن امەريكاسىنان كەلىپ جاتىر. وزدەرىڭىز بىلەسىزدەر، بۇل گەوساياسي ماسەلەگە بايلانىستى. شيكىزات پورتتارمەن كەلەدى. سونىڭ كەسىرىنەن بىزدە قانت باعاسى قىمباتتاپ جاتىر. بۇگىندە ءبىر كەلى قانتقا 450 تەڭگە ەڭ جاقسى باعا دەسە بولادى، – دەيدى جامبىل وبلىسى كاسىپكەرلىك باسقارماسىنىڭ باسشىسى اسپانديار سەيسەبايەۆ.  

اۋىل شارۋاشىلىعى مينيسترلىگىندەگىلەر قانت تاپشىلىعىن بولدىرماس ءۇشىن «بارىمىزدى سالىپ جاتىرمىز» دەيدى. قازاقستان تەمىرجولىمەن بىرلەسىپ وڭىرلەرگە ءتاتتىنى تاسىمالداۋدى جەدەلدەتۋگە كەلىسىپتى. جاقىندا ايماقتارعا 152 ۆاگون قانت تاراتىلماقشى.