Al azyq-túlikpen eldi qamtýǵa jaýapty aýyl sharýashylyǵy ministrligi jaqyn arada 150 vagon qantty óńirlerge taratyp beretinin aitty. Osylaisha tapshylyqty joimaqshy.
Aqtóbe turǵyndary úsh kúnnen beri qant taba almai sabylyp júr. Ákimdiktiń tikelei baqylaýyndaǵy áleýmettik dúkenderdiń sóresi de bos. Sýpermarketterde qumsheker tórt kún buryn bolǵan. Ol kezde kelisi 461 teńgeden satylypty. Qazir tek myń teńgelik qoraptaǵy shaqpaq qant qana qalǵan.
«Eki kúnnen beri sheker tappai júrmin. Biraz dúkenderge bardym. Qymbattap jatyr. Bári qymbattap jatyr, eki ese, úsh esege. Halyqtyń zeinetaqysy óte az, bizge qiyn» deidi jurt.
Aqtóbelik sheneýnikter bolsa turǵyndar «qanttan tapshylyq kórmeidi» dep, ant-sý iship otyr. Olar dúken sórelerin qumshekerge toltyryp, ár adamǵa úsh keliden artyq satpaýdy kózdep otyr. Osydan bir apta buryn kórshiles Oralda sheneýnikter de dál osylai aitqan edi.
Biraq Oralda jurt dúkende qantqa talasyp jatyr. Oralda qant úshin turǵyndar bir-birin taptap ketýge ázir. Shekerdi shektep satqannyń ózinde, jurttyń bárine sheker jetpeýde. «Dúkende qant joq. Ony qaidan alamyz? Nege joq? Qymbat bolsa da, joq! Nege qymbattata beredi qantty?!», «Shendiler «Qazaqstanda bári shyǵady» deidi al bizde joq. Álde qant Oraldan ainalyp kete me?» dep qarpaiym halyq narazylyqtaryn bildirip jatyr.
Buryn qant kórshiles Reseiden tasymaldanatyn. Naýryzda ol jaq táttini eksporttaýǵa tyiym salǵan. Endi elimizde tek Jambyl oblysyndaǵy qos zaýytqa telmirip otyr. Onyń biri jaqynda ǵana iske qosyldy. Zaýyttyń ózinde qant qazir kelisine 450 teńgeden shyǵyp jatyr. Sebebi, Latyn Amerikasynan jetkiziletin shikizat qymbattapty.
– Eger shikizat Qazaqstan, bolmasa, janymyzdaǵy Reseide bolsa, onyń baǵasyn qadaǵalaýǵa múmkindik bolar edi. Endi bul shikizat Latyn Amerikasynan kelip jatyr. Ózderińiz bilesizder, bul geosaiasi máselege bailanysty. Shikizat porttarmen keledi. Sonyń kesirinen bizde qant baǵasy qymbattap jatyr. Búginde bir keli qantqa 450 teńge eń jaqsy baǵa dese bolady, – deidi Jambyl oblysy kásipkerlik basqarmasynyń basshysy Aspandiiar Seisebaev.
Aýyl sharýashylyǵy ministrligindegiler qant tapshylyǵyn boldyrmas úshin «barymyzdy salyp jatyrmyz» deidi. Qazaqstan temirjolymen birlesip óńirlerge táttini tasymaldaýdy jedeldetýge kelisipti. Jaqynda aimaqtarǵa 152 vagon qant taratylmaqshy.
