الماتىدا قاڭتار وقيعاسى كەزىندە ارحەولوگتى اتىپ ولتىرگەن دەگەن كۇدىككە ىلىنگەن پولكوۆنيكتىڭ ءىسى قارالىپ جاتىر، - دەپ حابارلايدى Dalanews.kz رەسپۋبليكا باسىلىمىنا سىلتەمە جاساپ.
الماتىدا الماتى گارنيزونىنىڭ اسكەري سوتىندا سۋديا ايدار سەكەنوۆتىڭ توراعالىعىمەن ق ر ۇلتتىق ۇلانىنىڭ پولكوۆنيگى ايتجان اۋباكيروۆقا قاتىستى سوت باستالدى.
ول 2022 جىلعى 6 قاڭتاردا قارۋى جوق جانە قولىنا كىسەن سالىنعان اۋەسقوي ارحەولوگ ەرلان جاعىپاروۆتى اتىپ ولتىرگەن دەگەن كۇدىككە ءىلىندى.
سوتقا دەيىنگى تەرگەۋ 2024 جىلعى 6 تامىزدا اياقتالعان. جابىرلەنۋشى تاراپ 26 تومنان تۇراتىن ءىس ماتەريالدارىمەن ءبىر ايدىڭ ىشىندە تانىسىپ شىقتى.
ال ايىپتالۋشى تاراپ ىسكە ءتورت اي بويى، ونىڭ ىشىندە ەكى اي ەرلان جاعىپاروۆتىڭ اناسىنا تەرگەۋشىلەر قايتارعان ۇيالى تەلەفونىنىڭ مازمۇنىن زەرتتەۋگە جۇمسادى.
پولكوۆنيككە وكىلەتتىگىن اسىرا پايدالاندى دەگەن ايىپ تاعىلعان، الايدا جابىرلەنۋشى تاراپ ءىستى «ەكى جانە ودان دا كوپ ادامدى ءولتىرۋ» بابىنا قايتا كۆاليفيكاسيالاۋعا قول جەتكىزۋدى كوزدەپ وتىر. ەرلان جاعىپاروۆپەن بىرگە تاعى ءبىر جاس جىگىتتىڭ دە اتىلىپ ولتىرىلگەنى بەلگىلى.
