ءسىز مەملەكەت تىزگىنىن ۇستاعان وتىز جىلدىڭ ىشىندە تاۋەلسىز قازاقستاندا ەشقانداي وزگەرىس بولمادى دەسەك، بۇل – ادىلەتتىلىككە جاسالعان قيانات بولار ەدى. وتىز جىلدا جاسالعان جانە ەشكىم ەشقاشان جوققا شىعارا المايتىن ۇلى ەڭبەكتەردىڭ باسىندا، داۋ جوق، شەكارا سىرتىندا قالعان قانداستارىمىزدى اتاجۇرتىنا ورالتۋعا ارنالعان كوشى-قون ساياساتى تۇرادى.
جاقسىلىق پەن جامانشىلىق ەگىز عوي. ەگەر، اتالعان وتىز جىلدىڭ ىشىندە قاتەلىكتەر مەن كەمشىلىكتەر ورىن الىپ، حالىق ودان زارداپ شەكتى دەسە، ول زارداپتى تارتۋشىلاردىڭ باسىندا دا شەتتەن ورالعان قانداستارىمىز تۇرادى.
دەمەك، ۇلى كوشتىڭ وتىز جىلدا باسىپ وتكەن جولى وقتاي ءتۇزۋ بولا قويعان جوق، ىشكى جانە سىرتقى كۇشتەردىڭ كەدەرگىسىنە كوپ ۇشىرادى. اسىرەسە، قانسورعىش تيمۋر قۇلىبايەۆ پەن وپاسىز كارىم ءماسىموۆتىڭ ىقپالىمەن توقىراپ، توقتاپ قالا جازداعان كەزدەرى بولدى.
ءبىراق، سول ەكى سۇمىراي توندىرگەن ءقاۋىپ پەن قاتەردىڭ بارىنەن «...كەلىڭدەر دە، اينالايىن قازاعىم، كۇنىڭدى كورىپ، بايىڭدار!» دەپ، ۇلى كوشتى ۇنەمى ءوزىڭىز قۇتقارىپ الىپ وتىردىڭىز.
ءسىزدىڭ تاپسىرماڭىزبەن 1991 جىلعى 18 قاراشادا قازاق كسر مينيسترلەر كەڭەسى شىعارعان №711 قاۋلى جولىن اشقان ۇلى كوشتىڭ ارقاسىندا ءبىر جارىم ميلليونعا جۋىق قازاق تاريحي وتانىنا ورالدى.
ادىلەتتىلىك ءۇشىن ايتايىن، ۇلى كوش وتىز جىل بويى توقتاۋسىز جالعاستى.
ءقازىر، نەگە ەكەنى بەلگىسىز، «شەتتەگى قازاقتار»، «كوشى-قون»،
«قانداستار»، «دۇنيەجۇزى قازاقتارىنىڭ قۇرىلتايى» دەگەن سوزدەر مۇلدە ايتىلمايتىن بولىپ بارادى. تەك، پرەزيدەنتىمىز قاسىم-جومارت توقايەۆتىڭ 2019 جىلى ايتقان «دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز!» - دەگەن جالعىز اۋىز ءسوزىن داتكە قۋات ەتۋمەن قالعاندايمىز.
قاسىم-جومارت كەمەل ۇلى تۇرعاندا، ارينە، «قاسيەتتى پارىز» قاعاز جۇزىندە قالمايدى دەپ ويلايمىن. پرەزيدەنت كوشكە ءبىر قايىرىلىپ سوعادى دەپ سەنەمىن.
ال، ۇلى كوشتىڭ ودان ارعى جىلدارداعى تاعدىرى بۇلىڭعىر، توقتاپ قالا ما دەپ، قاتتى الاڭدايمىن...
يمپەريالاردىڭ وكتەمدىگىنىڭ كەسىرىنەن شەكارا سىرتىندا قالىپ، بىر-بىرىنەن اجىراپ قالعان اعايىننىڭ باسىن قوسقان «كوشى-قون» دەگەن وسى ۇلى ساياسات ءۇشىن مەن كەشە ءسىزدى قولداپ ارپالىسسام، بۇگىن قاسىم-جومارت كەمەل ۇلىنىڭ ءبىر جاعىنان شىعىسسام، كومەكتەسسەم دەپ شىر-پىر بولىپ ءجۇرمىن.
ءبىراق، جولىم دا، قولىم دا باياعىداي ەمەس، تارىلىپ، قىسقارىپ بارادى...
اسا مارتەبەلى نۇرسۇلتان ءابىش ۇلى!
مەنىڭ جەرلەستەرىم مەن تاعدىرلاستارىم ءسىزدىڭ ءبىزدى اتاجۇرتىمىزعا ورالۋىمىزعا زور مۇمكىندىك بەرگەن وسىناۋ قامقورلىعىڭىزدى ماڭگى ۇمىتپايدى! ءار ۋاقىت شىنايى ريزاشىلىقپەن ەسكە الىپ، العىسىن ايتاتىن بولادى.
وسى ۇلى ەڭبەگىنىز ءۇشىن مەن سىزگە ءدان ريزامىن!!
جامبىل اتامىزدىڭ جاسىنا جەتىڭىز!!!
https://youtu.be/KyosRWV-RQ0
