Siz memleket tizginin ustaǵan otyz jyldyń ishinde Táýelsiz Qazaqstanda eshqandai ózgeris bolmady desek, bul – ádilettilikke jasalǵan qiianat bolar edi. Otyz jylda jasalǵan jáne eshkim eshqashan joqqa shyǵara almaityn Uly eńbekterdiń basynda, daý joq, shekara syrtynda qalǵan qandastarymyzdy Atajurtyna oraltýǵa arnalǵan Kóshi-qon saiasaty turady.
Jaqsylyq pen jamanshylyq egiz ǵoi. Eger, atalǵan otyz jyldyń ishinde qatelikter men kemshilikter oryn alyp, halyq odan zardap shekti dese, ol zardapty tartýshylardyń basynda da shetten oralǵan qandastarymyz turady.
Demek, Uly kóshtiń otyz jylda basyp ótken joly oqtai túzý bola qoiǵan joq, ishki jáne syrtqy kúshterdiń kedergisine kóp ushyrady. Ásirese, qansorǵysh Timýr Qulybaev pen opasyz Kárim Másimovtyń yqpalymen toqyrap, toqtap qala jazdaǵan kezderi boldy.
Biraq, sol eki sumyrai tóndirgen qaýip pen qaterdiń bárinen «...kelińder de, ainalaiyn qazaǵym, kúnińdi kórip, baiyńdar!» dep, Uly kóshti únemi Ózińiz qutqaryp alyp otyrdyńyz.
Sizdiń tapsyrmańyzben 1991 jylǵy 18 qarashada Qazaq KSR Ministrler Keńesi shyǵarǵan №711 qaýly jolyn ashqan Uly kóshtiń arqasynda bir jarym millionǵa jýyq qazaq tarihi Otanyna oraldy.
Ádilettilik úshin aitaiyn, Uly kósh otyz jyl boiy toqtaýsyz jalǵasty.
Qazir, nege ekeni belgisiz, «Shettegi qazaqtar», «Kóshi-qon»,
«Qandastar», «Dúniejúzi qazaqtarynyń quryltaiy» degen sózder múlde aitylmaityn bolyp barady. Tek, Prezidentimiz Qasym-Jomart Toqaevtyń 2019 jyly aitqan «Dúniejúzindegi qandastarymyzdyń basyn týǵan jerde biriktirý – bizdiń qasietti paryzymyz!» - degen jalǵyz aýyz sózin dátke qýat etýmen qalǵandaimyz.
Qasym-Jomart Kemeluly turǵanda, árine, «Qasietti paryz» qaǵaz júzinde qalmaidy dep oilaimyn. Prezident Kóshke bir qaiyrylyp soǵady dep senemin.
Al, Uly kóshtiń odan arǵy jyldardaǵy taǵdyry bulyńǵyr, Toqtap qala ma dep, qatty alańdaimyn...
Imperiialardyń óktemdiginiń kesirinen shekara syrtynda qalyp, bir-birinen ajyrap qalǵan aǵaiynnyń basyn qosqan «Kóshi-qon» degen osy Uly saiasat úshin men keshe Sizdi qoldap arpalyssam, búgin Qasym-Jomart Kemelulynyń bir jaǵynan shyǵyssam, kómektessem dep shyr-pyr bolyp júrmin.
Biraq, jolym da, qolym da baiaǵydai emes, tarylyp, qysqaryp barady...
Asa mártebeli Nursultan Ábishuly!
Meniń jerlesterim men taǵdyrlastarym Sizdiń bizdi Atajurtymyzǵa oralýymyzǵa zor múmkindik bergen osynaý qamqorlyǵyńyzdy máńgi umytpaidy! Ár ýaqyt shynaiy rizashylyqpen eske alyp, alǵysyn aitatyn bolady.
Osy Uly eńbeginiz úshin men Sizge dán rizamyn!!
Jambyl atamyzdyń jasyna jetińiz!!!
https://youtu.be/KyosRWV-RQ0
