قازاقستان رەسپۋبليكاسى ۇكىمەتىنىڭ قاۋلىسىمەن قانات جۇماباي ۇلى ىسقاقوۆ مادەنيەت جانە اقپارات ءبىرىنشى ۆيسە-مينيسترى قىزمەتىنە تاعايىندالدى، دەپ حابارلايدى Dalanews.kz.
قانات ىسقاقوۆ 1982 جىلى شىمكەنت قالاسىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىن جانە م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىن ءتامامداعان.
ەڭبەك جولىن 2005 جىلى الماتى قالاسى جاستار ساياساتىن دامىتۋ مەملەكەتتىك قورىنىڭ جەتەكشى مامانى رەتىندە باستاعان. ءار جىلدارى ءتۇرلى مەملەكەتتىك قۇرىلىمداردا، ونىڭ ىشىندە ق ر پارلامەنتى ماجىلىسىندە، ق ر پرەزيدەنتى اكىمشىلىگىندە، مەملەكەتتىك حاتشىنىڭ حاتشىلىعىندا، سونداي-اق پرەزيدەنت اكىمشىلىگىنىڭ ستراتەگيالىق ازىرلەمەلەر جانە تالداۋ ورتالىعىندا جۇمىس ىستەگەن.
2012–2021 جىلدارى پرەزيدەنت اكىمشىلىگىنىڭ باسپا ءسوز قىزمەتىندە سەكتور مەڭگەرۋشىسى بولعان. 2021–2023 جىلدارى اقپارات جانە قوعامدىق دامۋ مينيسترلىگى اقپارات كوميتەتىنىڭ ءتوراعاسى قىزمەتىن اتقاردى.
2023 جىلدان بەرى مادەنيەت جانە اقپارات ۆيسە-مينيسترى لاۋازىمىندا جۇمىس ىستەپ كەلدى.
