تۇركيانىڭ 15 ميلليونعا جۋىق ازاماتى قاماۋعا الىنعان ىستامبۇل مەرى ەكرەم يماموعلۋدى ەل پرەزيدەنتتىگىنە كانديدات رەتىندە ۇسىندى، دەپ حابارلايدى Dalanews.kz.
بۇل تۋرالى تۇركيانىڭ وپپوزيسيالىق حالىق-رەسپۋبليكالىق پارتياسىنىڭ ءتوراعاسى وزگۇر وزەل ىستامبۇلدا سويلەگەن سوزىندە مالىمدەدى، دەپ حابارلايدى NTV.
سونداي-اق ول تۇركيا پرەزيدەنتى رەجەپ تايىپ ەردوعاندى مەرزىمىنەن بۇرىن پرەزيدەنت سايلاۋىن وتكىزۋ تۋرالى شەشىم قابىلداۋعا جانە ولارعا يماموعلۋمەن سايلاۋدا كۇرەسۋگە شاقىردى.
"23 ناۋرىزدا ەلىمىزدىڭ بولاشاق پرەزيدەنتى ەكرەم يماموعلۋعا پارتيامىزدىڭ 1،653 ملن مۇشەسى داۋىس بەردى. بۇل - قازىرگى توڭكەرىس ارەكەتىنە ەڭ كۇشتى جاۋاپ. سونداي-اق ازاماتتارعا بىزگە كەلىپ، داۋىس بەرۋ ءۇشىن ىنتىماقتاستىق جاشىكتەرىن ۇسىندىق. ناتيجەسىندە بولاشاق پرەزيدەنت ەكرەم ءۇشىن 13،21 ميلليون داۋىس الدىق. وعان بارلىعى 14،85 ميلليوننان استام ادام داۋىس بەردى"، - دەدى حرپ باسشىسى.
وزەل ساۋالناما ناتيجەلەرى ەردوعاننىڭ زاڭدى سايلانعانىنا كۇمان كەلتىرىپ، مەرزىمىنەن بۇرىن سايلاۋ وتكىزۋ قاجەت ەكەنىن تانىتۋدا.
تۇرىكتىڭ تانىمال ەسترادا ءانشىسى تاركان وتانىندا بولىپ جاتقان وقيعاعا قاتىستى تۇسىنىكتەمە بەردى. ول نارازىلىق اكسياسىنا شىعۋشىلاردىڭ تالابىن قولدادى.
"بارلىق ادىلەتسىزدىكتەر، زاڭسىز سوت پروسەستەرى جانە زاڭدى پروسەدۋراعا ساي كەلمەيتىن ارەكەتتەر ادامداردىڭ بۇگىندەرى دەمونستراسياعا شىعۋعا ءماجبۇر ەتىپ وتىر. دەموكراتيانى جاقتاۋشىلاردىڭ كوپ بولۋى مەنى قۋانتادى. بءىزدىڭ ادامدار ادىلەتسىزدىككە قارسى تۇرىپ، تۇتاسا ساياسي ومىرگە بەلسەنە ارالاسىپ جاتۋى مەندە ءبىر جاعىنان ماقتانىش، تاعى ءبىر جاعىنان ۋايىم سەزىمىن وياتتى. ءبىز ادىلەتتى جانە ەركىن بولاشاق ءۇشىن ءابسوليۋتتى تاۋەلسىزدىككە، زاڭ ۇستەمدىگىنە دەگەن سەنىمىمىزدى جوعالتپاي بىرىگە الاتىنىمىزدى كورگەننىڭ ءوزى ءبىر عانيبەت"، - دەپ جازدى ءانشى ح الەۋمەتتىك جەلىسىندە.
بۇعان دەيىن سايتىمىزدا "توڭكەرىس بولا جازدادى". قور نارىعى قۇلدىراپ، تۇركيا دۇربەلەڭگە بوي ۇرۋدا" دەگەن ماقالا جاريالانعان.
