سەنىڭ جاسىڭ ۇلكەن عوي، اقىلىڭ بار ەدى عوي، سەن ونى كەشىرگىن. بۇل سوزدەردى ءجيى ەستيمىز. ال پسيحولوگيالىق ادەبيەتتى وقۋعا قۇمار جاندار وزدەرىن رەنجىتكەن ادامداردى كەشىرۋ ءۇشىن اۆتورلار ۇسىنعان ءتاسىل بويىنشا اق پاراققا سانسىز رەت «مەن سەنى كەشىرەمىن» دەگەن سوزدەردى جازىپ، الەككە تۇسەتىنى بار.
وزىڭە ءوزىڭ زورلىق ەتۋ ماعان ۇنامايدى. اشۋعا بۋلىعىپ، كەۋدەڭدى رەنىش كەرنەپ تۇرعاندا، ءوزىڭدى ءوزىڭ باسىپ، كەشىرۋگە ءتيىسسىڭ دەۋ – سەزىمدەردى بۇعاۋعا سالىپ، ولاردى ءولتىرۋ قانشالىقتى مۇمكىن؟! اشۋدى، رەنىشتى قايدا قويامىز؟ ارينە، ىشتەي تىنىپ، كەك ساقتاپ، وكپەڭدى تەرەڭدەۋ ەتىپ كومىپ تاستاۋعا بولار. ءبىراق، كەز كەلگەن ولىك يىستەنەتىنى بار عوي. سول سياقتى ءولتىردىم دەگەن وكپەڭىز ەرتە مە، كەش پە، ءسىزدىڭ ومىرىڭىزگە قايتىپ ورالادى. پسيحوسوماتيكالىق سيپات الۋى كادىك. تۇماۋ نەمەسە اسقازاننىڭ ويىق جاراسى سياقتى. بولماسا، قايدان كەلگەنى بەلگىسىز كۇيزەلىس رەتىندە. ءومىردىڭ ماعىناسىزدىعىن پاش ەتىپ، ءىش پىستىرۋى مۇمكىن. ومىرگە دەگەن قۇشتارلىق ازاپتى ار ازابىنا ۇلاسۋى دا ىقتيمال.
وتكەن شاق تۋرالى ايتار بولساق، دەنساۋلىق ءۇشىن سەزىمدەردى ءولتىرۋ ەمەس، ولاردىڭ شىعۋ تەگىن ءتۇسىنۋ، نەگە سولاي بولعانىن تارازىلاۋ ماڭىزدى. قانداي سەزىمدى باستان كەشىرگەنىمىزدى بىلگەنىمىز دۇرىس. اشۋ ما؟ جاقسى. سول اشۋلاندىرعان ادامنان نە قالايتىنىمىزدى ءبىلۋىمىز كەرەك. ونى اياقپەن تەپكىلەپ، جالىنىشتى ۇنمەن كەشىرىم سۇراعانىن ەستىگىمىز كەلە مە؟ ونىڭ بەتىنە قاراپ، قانداي اقىماق ەكەنىن ايتقىمىز كەلە مە؟ مۇنداي قارسىلىق ءزىلى بار سەزىمدەر اركىمدە دە بولۋى مۇمكىن. اشۋعا بۋلىققان كەزدە ونى سىرتقا شىعارىپ العان جاقسى. جاستىقتى ۇرعىشتاپ الىڭىز. قولىڭىزعا قالام الىپ، حات جازىڭىز. جىبەرمەسەڭىزدە جەڭىلدەپ قالاسىز. جىبەرسەڭىز دە ەركىڭىز. ەڭ باستىسى – اشۋىڭىزدى ءتۇبى سارقىلعانشا شىعارۋ. بارلىق قارسىلىق پەن وكپەنى ايتىپ جەتكىزۋ. وسىلاي ىستەپ وتىرعاندا «مۇنى نەگە ىستەپ جاتىرمىن، ول مەنى ءبارىبىر ەستىمەيدى عوي» دەگەن ويعا قالاتىنىڭىز ءسوزسىز. سىرتىمنان اقىماق سەكىلدى كورىنىپ تۇرعان شىعارمىن، ادەپتى ادامدار بۇلاي ىستەمەيدى عوي دەپ ءوز وزىڭىزگە توقتاۋ سالارسىز، بالكي... سىرتقا شىققان اشۋ – كوپ ۋاقىتتان بەرى سىزگە مازا بەرمەي، ءتۇن ۇيقىڭىزدى قاشىرىپ، جان تىنىشتىعىڭىزدى ۇرلاعان بەيمازا كوڭىل-كۇي. ەگەر جاعدايدى ۋشىقتىرا بەرمەي، قارىم-قاتىناستى رەتتەگىڭىز كەلسە، ۋاقىت سوزباي سول اداممەن سويلەسكەنىڭىز ابزال. شەرىڭىزدى تارقاتقانىڭىز ءجون. اشۋدى تۇنشىقتىرىپ، وتىرىك كەشىرگەننەن ءسىزدىڭ جانىڭىزعا ەشبىر جەڭىلدىك كەلمەيدى.
بويىڭىزداعى سەزىمدەر تاسقىنى تاۋسىلعان ساتتە بارىپ، كەشىرۋگە جۇرەگىڭىز اشىلادى. ءبارى ارتتا قالدى، ءبارى ءبىتتى دەگەن سەزىمدى باستان كەشىرەسىز. ەگەر ءاربىر قايعى-مۇڭ سىيلاعان ساتتەردى ەموسيامەن ءبىلدىرىپ، وتكەرىپ وتىرسا، ونىڭ ەموسيالى زاريادى تاۋسىلادى. كوركەم فيلم قالاي بىتسە، ءسىزدىڭ اشۋىڭىزدا سولاي سارقىلادى. گەشتالت-تەراپيا تىلىمەن ايتقاندا، ءبىز گەشتالتتى جاۋىپ، قارىم-قاتىناس توپتاماسىنىڭ جاڭا بەتتەرىن اشامىز. ال ەگەر سەزىمدەردى كورسەتە وتىرىپ، شىن جۇرەكپەن كەشىرۋ مۇمكىن بولماسا، وندا ءسىزدىڭ اشۋىڭىزدىڭ شىعۋ تەگى مۇلدە باسقا بولعانى. ونىڭ تەرەڭدىگىنە تەك پسيحولوگ مامان عانا بويلاي الاتىن شىعار.
اۋداعان شىنار ءابىلدا
