Seniń jasyń úlken ǵoı, aqylyń bar edi ǵoı, sen ony keshirgin. Bul sózderdi jıi estımiz. Al psıhologıalyq ádebıetti oqýǵa qumar jandar ózderin renjitken adamdardy keshirý úshin avtorlar usynǵan tásil boıynsha aq paraqqa sansyz ret «men seni keshiremin» degen sózderdi jazyp, álekke túsetini bar.
Ózińe óziń zorlyq etý maǵan unamaıdy. Ashýǵa býlyǵyp, keýdeńdi renish kernep turǵanda, ózińdi óziń basyp, keshirýge tıissiń deý – sezimderdi buǵaýǵa salyp, olardy óltirý qanshalyqty múmkin?! Ashýdy, renishti qaıda qoıamyz? Árıne, ishteı tynyp, kek saqtap, ókpeńdi tereńdeý etip kómip tastaýǵa bolar. Biraq, kez kelgen ólik ıistenetini bar ǵoı. Sol sıaqty óltirdim degen ókpeńiz erte me, kesh pe, sizdiń ómirińizge qaıtyp oralady. Psıhosomatıkalyq sıpat alýy kádik. Tumaý nemese asqazannyń oıyq jarasy sıaqty. Bolmasa, qaıdan kelgeni belgisiz kúızelis retinde. Ómirdiń maǵynasyzdyǵyn pash etip, ish pystyrýy múmkin. Ómirge degen qushtarlyq azapty ar azabyna ulasýy da yqtımal.
Ótken shaq týraly aıtar bolsaq, densaýlyq úshin sezimderdi óltirý emes, olardyń shyǵý tegin túsiný, nege solaı bolǵanyn tarazylaý mańyzdy. Qandaı sezimdi bastan keshirgenimizdi bilgenimiz durys. Ashý ma? Jaqsy. Sol ashýlandyrǵan adamnan ne qalaıtynymyzdy bilýimiz kerek. Ony aıaqpen tepkilep, jalynyshty únmen keshirim suraǵanyn estigimiz kele me? Onyń betine qarap, qandaı aqymaq ekenin aıtqymyz kele me? Mundaı qarsylyq zili bar sezimder árkimde de bolýy múmkin. Ashýǵa býlyqqan kezde ony syrtqa shyǵaryp alǵan jaqsy. Jastyqty urǵyshtap alyńyz. Qolyńyzǵa qalam alyp, hat jazyńyz. Jibermeseńizde jeńildep qalasyz. Jiberseńiz de erkińiz. Eń bastysy – ashýyńyzdy túbi sarqylǵansha shyǵarý. Barlyq qarsylyq pen ókpeni aıtyp jetkizý. Osylaı istep otyrǵanda «muny nege istep jatyrmyn, ol meni báribir estimeıdi ǵoı» degen oıǵa qalatynyńyz sózsiz. Syrtymnan aqymaq sekildi kórinip turǵan shyǵarmyn, ádepti adamdar bulaı istemeıdi ǵoı dep óz ózińizge toqtaý salarsyz, bálkı... Syrtqa shyqqan ashý – kóp ýaqyttan beri sizge maza bermeı, tún uıqyńyzdy qashyryp, jan tynyshtyǵyńyzdy urlaǵan beımaza kóńil-kúı. Eger jaǵdaıdy ýshyqtyra bermeı, qarym-qatynasty rettegińiz kelse, ýaqyt sozbaı sol adammen sóıleskenińiz abzal. Sherińizdi tarqatqanyńyz jón. Ashýdy tunshyqtyryp, ótirik keshirgennen sizdiń janyńyzǵa eshbir jeńildik kelmeıdi.
Boıyńyzdaǵy sezimder tasqyny taýsylǵan sátte baryp, keshirýge júregińiz ashylady. Bári artta qaldy, bári bitti degen sezimdi bastan keshiresiz. Eger árbir qaıǵy-muń syılaǵan sátterdi emosıamen bildirip, ótkerip otyrsa, onyń emosıaly zarády taýsylady. Kórkem fılm qalaı bitse, sizdiń ashýyńyzda solaı sarqylady. Geshtalt-terapıa tilimen aıtqanda, biz geshtaltty jaýyp, qarym-qatynas toptamasynyń jańa betterin ashamyz. Al eger sezimderdi kórsete otyryp, shyn júrekpen keshirý múmkin bolmasa, onda sizdiń ashýyńyzdyń shyǵý tegi múlde basqa bolǵany. Onyń tereńdigine tek psıholog maman ǵana boılaı alatyn shyǵar.
Aýdaǵan Shynar ÁBİLDÁ
