الەۋمەتتىك جەلىلەردە اتىراۋلىق بلوگەر قۇرالاي بولاتوۆا جانتۇرشىگەرلىك جايت تۋرالى ۇندەۋ جاسادى، دەپ حابارلايدى Dalanews.kz.
جەلىدەگى اقپاراتقا سۇيەنسەك، Instagram-دا 13 مىڭ وقىرمانى بار بلوگەر قۇرالاي بولاتوۆا شابۋىل قۇربانى بولعان.
قىزدىڭ ايتۋىنشا، ول ىستامبۇلعا تۋردى جارنامالاۋعا كەلىسىپ، ءوزى دە 100 مىڭ تەڭگە الدىن الا تولەگەن. الايدا ساپار ورىندالماعان، ال اقشاسىن قايتارۋدى تالاپ ەتكەن كەزدە وعان قوقان-لوققى جاسالا باستاعان.
3 قازاندا تۋردى ۇيىمداستىرعان قىزدار بلوگەردى اڭدىپ، "سويلەسەيىك" دەپ كولىككە وتىرعىزعان. كەيىن ونى قالا سىرتىنداعى زيرات ماڭىنا اپارىپ، دەنە جاراقاتىن سالعان.
اتىراۋ وبلىستىق پوليسيا دەپارتامەنتى Dalanews.kz-كە بەرگەن جاۋابىندا وسى جايتقا قاتىستى پىكىر ءبىلدىردى.
"4 قازاندا 25 جاستاعى اتىراۋلىق تۇرعىن پوليسياعا وزىنە تانىستارى دەنە جاراقاتىن سالعانى جونىندە ارىزبەن جۇگىندى. بۇل دەرەك بويىنشا قىلمىستىق ءىس قوزعالدى. كۇدىكتىلەر انىقتالىپ، پوليسياعا جەتكىزىلدى.
ءقازىر وقيعانىڭ بارلىق ءمان-جايىن انىقتاۋ ماقساتىندا كەشەندى تەرگەۋ جۇرگىزىلىپ جاتىر. بەينەباقىلاۋ جازبالارى الىندى، كۋاگەرلەردەن جاۋاپ الىنىپ، بەتتەستىرۋ وتكىزىلدى. ارىزدانۋشىنىڭ بارلىق ءۋاجى تولىعىمەن تەكسەرىلەدى، ءاربىر قاتىسۋشىنىڭ ىس-ارەكەتىنە زاڭ اياسىندا باعا بەرىلەدى. بۇل ءىستىڭ تەرگەۋ بارىسى مەنىڭ جەكە باقىلاۋىمدا"، - دەدى اتىراۋ وبلىستىق پد باسشىسى.
