Áleýmettik jelilerde atyraýlyq bloger Quralai Bolatova jantúrshigerlik jait týraly úndeý jasady, dep habarlaidy Dalanews.kz.
Jelidegi aqparatqa súiensek, Instagram-da 13 myń oqyrmany bar bloger Quralai Bolatova shabýyl qurbany bolǵan.
Qyzdyń aitýynsha, ol Ystambulǵa týrdy jarnamalaýǵa kelisip, ózi de 100 myń teńge aldyn ala tólegen. Alaida sapar oryndalmaǵan, al aqshasyn qaitarýdy talap etken kezde oǵan qoqan-loqqy jasala bastaǵan.
3 qazanda týrdy uiymdastyrǵan qyzdar blogerdi ańdyp, "sóileseiik" dep kólikke otyrǵyzǵan. Keiin ony qala syrtyndaǵy zirat mańyna aparyp, dene jaraqatyn salǵan.
Atyraý oblystyq Politsiia departamenti Dalanews.kz-ke bergen jaýabynda osy jaitqa qatysty pikir bildirdi.
"4 qazanda 25 jastaǵy atyraýlyq turǵyn politsiiaǵa ózine tanystary dene jaraqatyn salǵany jóninde aryzben júgindi. Bul derek boiynsha qylmystyq is qozǵaldy. Kúdiktiler anyqtalyp, politsiiaǵa jetkizildi.
Qazir oqiǵanyń barlyq mán-jaiyn anyqtaý maqsatynda keshendi tergeý júrgizilip jatyr. Beinebaqylaý jazbalary alyndy, kýágerlerden jaýap alynyp, bettestirý ótkizildi. Aryzdanýshynyń barlyq ýáji tolyǵymen tekseriledi, árbir qatysýshynyń is-áreketine zań aiasynda baǵa beriledi. Bul istiń tergeý barysy meniń jeke baqylaýymda", - dedi Atyraý oblystyq PD basshysy.
