ءماجىلىس دەپۋتاتى تاڭساۋلە سەرىكوۆ ەلدە پاراليمپياداعا ءوز دەڭگەيىندە قارجى بولىنبەيتىنىن اشىق سىناعان ەدى. وسى جايتقا قاتىستى قازاقستاننىڭ اۋە-سپورتتىق ەكۆيليبرى بويىنشا فەدەراسياسى وكىلدەرى ۇندەۋ جاريالادى، - دەپ حابارلايدى Dalanews.kz.
سەرىكوۆتىڭ ايتۋىنشا، قازاقستاندا ستريپتيز كورسەتىلەتىن سپورتقا اقشا بولىنەدى.
"وليمپيادالىق ەمەس سپورت تۇرلەرىن قولدايمىز، جاقسى، جارايسىزدار. ال مۇگەدەكتەر توقالدان تۋدى ما؟ بىردە-بىرەۋىنە قولداۋ كورسەتىلمەيدى. مۇگەدەكتەر دە سپورتپەن شۇعىلدانعىسى كەلەدى.مۇگەدەكتەر دە ادامدار، ولار دا التىن اكەلەدى. نيدەرلاندى ءبىر جىل ىشىندە وليمپياداعا 41 ميلليون دوللار جۇمسايدى، ەلگە 36 مەدال اكەلەدى، ونىڭ 10-ى التىن. قازاقستاندا 775 ميلليون دوللار جۇمسايمىز، ءبىراق 8 قولا مەدال اكەلەمىز. پاراليمپيادامەن سالىستىرىڭىز. ...ءبىزدىڭ پارا ۆەلوسيپەدشىلەرىمىزدى ساۋساقپەن ساناۋعا بولادى، ءبىراق ولارعا ۆەلوسيپەد ساتىپ الىپ بەرە المايمىز. ۆەلوسيپەد قازاقستانعا جەتكەنشە، ونىڭ باعاسى 9 ميلليوننان 36 ميلليونعا دەيىن ءوسىپ كەتەدى. سودان كەيىن وعان بۇكىل ەل بولىپ جيناپ بەرەمىز. ءبىراق بۇل رەتتە مەملەكەت ستريپتيز كورسەتىلەتىن سپورت تۇرىنە اقشا بولەدى"،- دەگەن ەدى دەپۋتات.
داۋلى دەپۋتاتتىق ساۋالدان كەيىن سپورتشىلار باس كوتەردى. قازاقستاننىڭ اۋە-سپورتتىق ەكۆيليبر بويىنشا فەدەراسياسىنىڭ وكىلدەرى پرەزيدەنت قاسىم-جومارت توقايەۆقا ۆيدەوۇندەۋ جولدادى.
"پيلونداعى سپورت ستريپتيزگە تەڭ ەمەس. بۇل - كوكجيەگى تار ادامداردىڭ ويى. پيلونداعى سپورت - كوپ ۋاقىتتى، كۇش پەن توزىمدىلىكتى قاجەت ەتەتىن سپورت. ...ءبىزدىڭ فەدەراسياداعى سپورتشىلاردىڭ باسىم بولىگى - كامەلەت جاسىنا تولماعان بالالار. ولار - حالىقارالىق، الەم چەمپيوناتتارىنىڭ جۇلدەگەرلەرى. ...قۇرمەتتى پرەزيدەنت وسى ماسەلەنى شەشۋىڭىزدى سۇرايمىز جانە بالالارىمىزدىڭ، سپورتتىڭ قورعالاتىنىنا سەنەمىز"، - دەدى قازاقستاننىڭ اۋە-سپورتتىق ەكۆيليبر بويىنشا فەدەراسياسى وكىلدەرى.
