قاراپايىم قازاققا ءتان وسىنداي ارەكەتتەر توقايەۆتى حالىققا جاقىنداتا تۇسەتىنى انىق. بىرەۋلەر مۇنى «ساياسي ۇپاي جيناۋ ءۇشىن ادەيى ۇيىمداستىردى» دەپ ايتۋى مۇمكىن. بۇل تۇبىرىمەن قاتە پىكىر. ءبىر كۇندىك اۋىزاشار ەشكىمگە ساياسي ۇپاي اكەلمەسى انىق. بۇگىندە قازاق حالقى مۇندايعا الدانبايدى. ساياسي وي-ساناسى وسكەن. مۇنى توقايەۆتىڭ ءوزى دە جاقسى بىلەدى.
جىلدا جاڭا جىل قارساڭىنا «پرەزيدەنت شىرشاسى» ۇيىمداستىرىلىپ، بالا-شاعى مارە-سارە بولىپ جاتاتىنىن ءبارىمىز بىلەمىز. ءبىراق سول كەزدە «پرەزيدەنت بالالاردى شىرشا باسىنا جيناپ، ساياسي ۇپاي جيناپ جاتىر» دەپ ەشكىم ايتپايدى عوي.
الداعى ۋاقىتتا پرەزيدەنتتىڭ اۋىزاشار بەرۋى دە سونداي ادەپكى، قازاقى دۇنيە بولىپ، سانامىزعا ءسىڭىپ كەتۋى ءتيىس.
ەسىڭىزدە بولار، «قاڭتار قاسىرەتىنە» قىرىق كۇن تولعاندا، توقايەۆ قاندى قىرعىندا قازا بولعانداردىڭ رۋحىنا باعىشتاپ، قۇربان شالدى. سول كەزدە پرەزيدەنتىمىز جانى اۋىرعان قاراپايىم حالىقپەن بىرگە كۇيزەلگەنىن بايقادىق. ارىستا بولعان جارىلىس كەزىندە دە توقايەۆ ءبىرىنشى بولىپ بارىپ، قاراپايىم حالىققا قولداۋ كورسەتتى. سول كەزدە دە كوڭىلىمىز ءوسىپ قالعان ەدى.
ەندى قازاقى ءداستۇردى ساقتاپ، جۇرتقا اۋىزاشار بەرىپ وتىر.
30 جىل بويى بيلىك تاراپىنان ۇلتتىق قۇندىلىقتارىمىزعا ءتيىستى دەڭگەيدە قۇرمەت بولماعان سوڭ، مۇنىڭ ءبارى بىزگە تاڭسىق بولىپ كورىنۋى مۇمكىن.
وسىنداي بىر-ەكى اۋىزاراشاردان كەيىن مۇنىڭ ءبارى قالىپتى دۇنيەگە اينالۋى شارت.
كەرەك دەسەڭىز، اقوردانىڭ قاقپاسىنىڭ الدىنا بارىپ، ەلوردالىق بۇلدىرشىندەر «جاراپازان» ايتىپ، توقايەۆ بۇلدىرشىندەردىڭ قالتاسىنا تاتتىگە تولتىرىپ جاتسا، تاعى دا تاڭقالماڭىز. توقايەۆ ءداستۇردى سىيلايتىن قازاق ادام دەپ قابىلداڭىز. بولدى، ءبىتتى.
نەسىن ايتاسىز، وسىعان دەيىن ەردوعاننىڭ قاراپايىم تۇرىكتەردىڭ ۇيىندە اۋىزاشاردا وتىرعان فوتوسىن كورىپ تاڭقالۋشى ەدىك. ەندى توقايەۆتىڭ اۋىزاشار بەرگەن سۋرەتىن جەلىگە سالىپ تامساناتىن بولدىق.
ال اعايىن، نيەت قابىل بولسىن! ورازادان ورازاعا ەسەن-ساۋ جەتە بەرەيىك!
نۇرلان جۇماحانوۆ، جۋرناليست
نۇرلان جۇماحانوۆ، جۋرناليست
