قازاقستاندا پرەزيدەنتتىك تەست وتكىزۋ ەرەجەلەرىنەن تۇڭعىش پرەزيدەنت نۇرسۇلتان نازاربايەۆقا قاتىستى اتاۋ رەسمي تۇردە الىنىپ تاستالدى. بۇل تۋرالى مادەنيەت جانە سپورت مينيسترلىگىنىڭ بۇيرىعىندا كورسەتىلگەن، دەپ حابارلايدى Dalanews.kz.
قازاقستاندا ءبىراز جىلدان بەرى “ەلباسى تەستى” اتاۋىمەن بەلگىلى سپورتتىق ءنورماتيۆتىڭ رەسمي اتاۋى وزگەرتىلدى.
جاڭا رەداكسيادا قۇجاتتىڭ اتاۋى:
“قازاقستان رەسپۋبليكاسى حالقىنىڭ دەنە دايارلىعىن باعالاۋعا ارنالعان پرەزيدەنتتىك تەستىلەردى وتكىزۋ قاعيدالارىن بەكىتۋ تۋرالى” دەپ كورسەتىلگەن.
ايتا كەتەيىك، بۇرىن بۇل ەرەجە “تۇڭعىش پرەزيدەنت – ەلباسى تەستى” دەپ اتالعان. جاڭا وزگەرىس 2025 جىلدىڭ 16 ماۋسىمىنان باستاپ كۇشىنە ەندى.
ەسكە سالايىق، نۇرسۇلتان نازاربايەۆقا “ەلباسى” مارتەبەسى 2010 جىلى رەسمي تۇردە بەرىلگەن ەدى. بۇل اتاق وعان ءومىر بويى ارتىقشىلىقتار مەن قۇقىقتار بەردى. اتاپ ايتاتىن بولساق، قىلمىستىق جاۋاپكەرشىلىكتەن قورعانۋ، قاۋىپسىزدىك كەڭەسىن باسقارۋ، ءوزى مەن وتباسىنا ماتەريالدىق جانە الەۋمەتتىك كەپىلدىكتەر قاراستىرۋ.
الايدا 2022 جىلى قاڭتار وقيعاسىنان كەيىن قازاقستان بيلىگى جەكە باسقا تابىنۋشىلىقتان باس تارتۋ جانە سۋپەرپرەزيدەنتتىك جۇيەدەن پارلامەنتتىك باسقارۋ ۇلگىسىنە كوشۋ جولىندا “ەلباسى” تۋرالى زاڭدى جويۋدى قولعا الدى.
