– قازاقستان رەسپۋبليكاسى پرەمەر-مينيسترى لاۋازىمىنا تاعايىنداۋعا كەلىسىم بەرۋ ءۇشىن ءاليحان اسحان ۇلى سمايىلوۆتىڭ كانديداتۋراسىن پارلامەنت ءماجىلىسىنىڭ قاراۋىنا ۇسىنامىن. ول تاجىريبەلى مامان، ەڭبەكقور مەملەكەتتىك قىزمەتشى. ستاتيستيكا جونىندەگى اگەنتتىكتىڭ ءتوراعاسى، پرەزيدەنتتىڭ كومەكشىسى، قارجى ءمينيسترى، پرەمەر-مينيستردىڭ ءبىرىنشى ورىنباسارى بولدى. قازاقستان ەكونوميكاسىنىڭ بولاشاعى تۋرالى كوزقاراسى دۇرىس. ناقتى جوسپارى بار. ءاليحان اسحان ۇلى ۇكىمەتتىڭ جۇمىسىن وتە جاقسى بىلەدى. وزىندە جۇكتەلگەن مىندەتتەردى ابىرويمەن اتقارادى دەپ سەنەمىن، – دەدى ءماجىلىس وتىرىسىندا بەينەبايلانىس ارقىلى قاتىسقان
مەملەكەت باسشىسى قاسىم-جومارت توقايەۆ. بۇعان دەيىن ق ر پرەزيدەنتىنىڭ باسپا ءسوز حاتشىسى بەرىك ءۋالي مەملەكەت باسشىسىنىڭ بەينەبايلانىس ارقىلى پارلامەنت ءماجىلىسىنىڭ وتىرىسىنا قاتىسىپ، ەلىمىزدىڭ جاڭا پرەمەر-مينيسترىنىڭ كانديداتۋراسىن ۇسىناتىندىعىن حابارلاعان بولاتىن.
سونداي-اق پرەزيدەنت ساياسي جانە الەۋمەتتىك-ەكونوميكالىق سالالارداعى وزەكتى ماسەلەلەردى شەشۋ بويىنشا اۋقىمدى بايانداما جاسايدى دەپ كۇتىلۋدە.
