ق ر پرەزيدەنتىنىڭ كەڭەسشىسى – باسپا ءسوز حاتشىسى بەرىك ءۋالي مەملەكەت باسشىسى قاسىم-جومارت توقايەۆ جاڭا جىلدى قالاي قارسى الاتىنىن ايتتى، - دەپ حابارلايدى Dalanews.kz Tengrinews.kz-كە سىلتەپ.
پرەزيدەنتتىڭ جاڭا جىلعا قانداي جوسپارى بار؟ مەملەكەت باسشىسى اتالعان مەيرامدى ادەتتە قالاي قارسى الادى؟ قاڭتار ايىنىڭ العاشقى كۇندەرى دەمالىسقا نەمەسە ساپارعا شىعۋدى ويلاستىرىپ وتىرعان جوق پا؟
"مەملەكەت باسشىسى جاڭا جىلدى ەلىمىزدىڭ ميلليونداعان ازاماتتارى سەكىلدى ءوز شاڭىراعىندا، تۋىستارىمەن بىرگەمەرەكەلىك داستارقان باسىندا قارسى الادى. پرەزيدەنتتىڭ جاڭا جىلدا شەتەلگە شىعۋ نەمەسە دەمالۋ تۋرالى جوسپارى جوق"، - دەدى بەرىك ءۋالي Tengrinews.kz ءتىلشىسىنىڭ سۇراعىنا.
بەرىك ءۋالي قاسىم-جومارت كەمەل ۇلىنىڭ دەمالىسقا ۋاقىتى تاپشى ەكەنىن، پرەزيدەنت مەرەكە كۇندەرى دە جۇمىس ىستەپ، قۇجاتتار قارايتىنىن اتاپ ءوتتى.
ايتا كەتەيىك، مەملەكەت باسشىسى قاسىم-جومارت توقايەۆتىڭ "انا ءتىلى" گازەتىندە كەڭ كولەمدى سۇحباتى جارىق كورەدى.
سۇحبات 2025 جىلدىڭ 3 قاڭتاردا جاريالانادى.
پرەزيدەنت سۇحباتتا ىشكى جانە سىرتقى ساياساتتاعى باستى وقيعالارعا باعاسىن بەرەدى.
سونداي-اق ەلدىڭ بيىلعى ساياسي جانە الەۋمەتتىك-ەكونوميكالىق تۇرعىدان دامۋىن قورىتىندىلاپ، الداعى كەزەڭگە ارنالعان باسىم مىندەتتەردى ايقىندايدى.
