پرەزيدەنت «قاڭتار وقيعاسىنا» قاتىستى ماڭىزدى دەرەكتەرگە توقتالىپ، الماتىعا شابۋىل جاساعان قاراقشىلار مەن بۇزاقىلاردىڭ ۇلكەن قىلمىسقا بارعاندىعىن جانە ۇيىمداسقان قىلمىستىق توپتار بيلىكتى باسىپ الماق ويلارى بولعاندىعىن جەتكىزدى. بۇگىندە، قايعىلى وقيعا بويىنشا كۇردەلى تەرگەۋ جۇمىستارى جۇرگىزىلىپ جاتقاندىعىن، سونداي-اق جازىقسىز قاماۋعا الىنعانداردى دا تەرگەۋ انىقتاۋدا دەپ ايتتى.
سونداي-اق، مەملەكەت باسشىسى الماتىداعى بۇلىك كەزىندە ەلگە تارتىلعان ۇجىمدىق قاۋىپسىزدىك تۋرالى شارت ۇيىمىنىڭ اسكەرىن شاقىرعانى ءۇشىن ەشكىمنىڭ الدىندا قارىز بولىپ قالماعاندىعىن ءتۇسىندىرىپ ايتتى. ويتكەنى، بۇگىندە وسى ماسەلەگە قاتىستى ەل اراسىندا شىندىققا جاناسپايتىن ءتۇرلى اڭگىمەلەر ءجۇر. پرەزيدەنت بۇل شەشىمدى باسقا دا قالالاردى باسىپ الۋدىڭ الدىن الۋ ءۇشىن قابىلداعانىن جەتكىزدى.
مەملەكەت باسشىسى قاڭتار وعيعاسى بارلىعىمىزعا ساباق بولعانىن جەتكىزە كەلە: «بۇل ماسەلەگە قاتىستى جان-جاقتى زەرتتەيتىن بولساق، حالىقتىڭ نارىزىلىعىنىڭ استارىندا وتكىر الەۋمەتتىك ماسەلە جاتىر. حالىقتىڭ كوبىنىڭ الەۋمەتتىك جاعدايى تومەن. ونى مويىنداۋىمىز كەرەك. ول اقيقات. مەملەكەتتىڭ تۇتاس بايلىعى از عانا توپتىڭ قولىندا. تەڭسىزدىك بەلەڭ الۋدا. بۇل ماسەلە تۋرالى مەن پارلامەنتتە، باسقا دا جيىنداردا ايتتىم. وكىنىشتىسى، ازاماتتاردىڭ نارازىلىعىن قىلمىسكەرلەر، لاڭكەستەر پايدالانىپ كەتتى» دەپ ايتتى.
سونىمەن قاتار، بۇگىنگى ەلىمىزدە قابىلدانىپ جاتقان بارلىق رەفورمالارعا وسى وقيعا سەبەپشى بولعاندىعىن جەتكىزدى.
جالپى، پرەزيدەنتتىڭ قوعامدا ءجيى تالقىلانىپ، كوپشىلىكتىڭ كوكەيىندە جۇرگەن ماڭىزدى ساۋالدارعا بەرگەن ناقتى ءارى تۇشىمدى جاۋاپتارى كوپشىلىكتىڭ كوڭىلىنە سەنىم ۇيالاتتى دەپ ويلايمىن.
پرەزيدەنتىمىز سۇحباتىنىڭ سوڭىندا وتانىمىز جالعىز جانە ونى قورعاۋ – ءاربىرىمىزدىڭ ازاماتتىق بورىشىمىز دەدى. ولاي بولسا، ەلىمىزدى قورعاۋ جانە ونىڭ وركەندەۋى ءۇشىن ەڭبەك ەتۋ – بارشامىزعا جۇكتەلگەن ورتاق مىندەت.
ەندەشە، بىزگە بەرىلگەن مۇمكىندىكتى پايدالانا وتىرىپ، ەلىمىزدىڭ تۋەلسىزدىگىن تۇعىرلى ەتۋ جولىندا بارشامىز ايانباي ەڭبەك ەتەيىك، اعايىن.
قايرات بالابييەۆ، تۇركىستان وبلىستىق ءماسليحاتىنىڭ حاتشىسى
