قىرعىزستان پرەزيدەنتى المازبەك اتامبايەۆ ەلدى تۇراقتى دامىتۋ ۇلتتىق كەڭەسىنىڭ بەسىنشى وتىرىسىندا مۇراگەرىنىڭ كىم ەكەندىگى تۋرالى ايتىپ بەردى، دەپ جازدى kabar.kg.
ونىڭ ايتۋىنشا، ول قايدا بارسا دا، كىممەن كەزدەسسە دە بارلىعى ودان مۇراگەر رەتىندە كىمدى لايىقتى سانايتىنىن سۇرايدى.
«بۇل تۋرالى مەنەن انگەلا مەركەل دە، ۆلاديمير پۋتين دا سۇرادى. كەيبىر ساياساتكەرلەر مەن جۋرناليستەر ءوزىمدى قورعايتىن مۇراگەردى تاپپاي جۇرگەنىم تۋرالى ماقالالار جازۋدا. مەن تەك اللادان قورقاتىنىمدى مالىمدەيمىن. ماعان مەنى قورعايتىن مۇراگەر ەمەس، ءبىزدىڭ ۇلتتىق جانە مادەني قۇندىلىقتارىمىزدى ساقتاپ، حالقىمىزدى قورعايتىن مۇراگەر كەرەك»
- دەدى اتامبايەۆ.
«ەلىمىزدىڭ بارلىق ازاماتتارى - مەنىڭ مۇراگەرلەرىم. ءبىزدىڭ ءارقايسىسىمىز، ءاربىر قىرعىز ازاماتى - اتا-بابالارىمىزدىڭ مۇراگەرى بولىپ تابىلادى. كەلەسى پرەزيدەنتتىڭ كىم بولاتىنىن - سايلاۋ كورسەتەدى. مەن ونى بىلمەيمىن. مەنىڭ مىندەتىم - ءادىل جانە اشىق سايلاۋ وتكىزۋ»، - دەپ مالىمدەدى قىرعىزستان پرەزيدەنتى. بۇرىن حابارلانعانداي، قىرعىزستاندا پرەزيدەنت سايلاۋى كونستيتۋسيالىق زاڭعا سايكەس، 2017 جىلدىڭ 19 قاراشا كۇنى وتەدى.
دەرەككوز: قازاقپارات
