ەلىمىز ءۇشىن 2022 جىلدىڭ باسى وتە كۇردەلى داعدارىسپەن، اۋىر سىنمەن تۇسپا تۇس كەلدى. مەملەكەتىمىزگە قارسى، ەلىمىزدىڭ كونستيتۋسيالىق قۇرىلىمىنا قارسى تەرروريستىك شابۋىل جاسالدى. وعان بۇكىل ەل بولىپ بىرىگىپ، تويتارىس بەردىك.
كونترتەرروريستىك وپەراسيانىڭ نەگىزگى فازاسى اياقتالۋعا تابان تىرەدى، سوڭعى مالىمەتتەر بويىنشا، ەلىمىزدىڭ بارلىق وڭىرىندە احۋال تۇراقتى. بۇل رەتتە مەملەكەت باسشىسى ۇقشۇ-نىڭ بىتىمگەر كۇشتەرىنىڭ كومەگى تۋرالى ۇجىمدىق قاۋىپسىزدىك شارت ۇيىمىنىڭ كەزەكتەن تىس سەسسياسىندا سويلەگەن سوزىندە تولىقتاي ايتىپ كەتتى.
ال بۇگىنگى ءماجىلىس وتىرىسىندا قاسىم-جومارت كەمەل ۇلى ۇقشۇ بىتىمگەر كۇشتەرىنىڭ نەگىزگى ميسسياسىنىڭ ءساتتى اياقتالعانىن مالىمدەپ، ەكى كۇننەن كەيىن ۇقشۇ-نىڭ بىرلەسكەن بىتىمگەر كونتينگەنتىن قازاقستاننىڭ جەرىنەن كەزەڭ-كەزەڭمەن شىعارۋ باستالاتىنىن اتاپ كورسەتتى.
سونداي-اق، بۇگىن پرەزيدەنتتىڭ ۇسىنىسىمەن ق ر پرەمەر-مينيسترى لاۋازىمىنا ءاليحان سمايىلوۆتىڭ كانديداتۋراسى ءماجىلىس دەپۋتاتتارىنىڭ ءبىراۋىزدان قولداۋىمەن بەكىتىلدى. پرەمەر-مينيستر كانديداتۋراسىن تاڭداۋدا مەملەكەتىمىزدىڭ الدىندا تۇرعان مەملەكەتتىك قارجى مەن ەكونوميكانى قايتا جاڭعىرتۋ بويىنشا اۋقىمدى مىندەتتەردى جۇزەگە اسىرۋ ماسەلەلەرى دە ۇلكەن ءرول اتقاردى.
جالپى، مەملەكەت باسشىسىنىڭ ۇكىمەت باسشىسى مەن قۇرامى الدىندا قويعان ماڭىزدى مىندەتتەردى بىرنەشە بلوكقا بولۋگە بولادى. ەڭ الدىمەن، ەلىمىزدىڭ اسكەري، قۇقىق قورعاۋ جانە قارۋلى كۇشتەر سالاسىن رەفورمالاۋ ماسەلەسى. جانە ول وتە زاڭدى، ءارى سوڭعى جاعدايلار كورسەتكەندەي – ۋاقىت كەشىكتىرمەيتىن مىندەت.
«ەلىمىزدىڭ قاۋىپسىزدىگىن نىعايتۋ جانە قاۋىپ-قاتەردىڭ الدىن الۋ ءۇشىن شۇعىل ءىس-شارالاردى جۇزەگە اسىرۋ قاجەت... مەملەكەتتىك شەكارانى نىعايتۋىمىز كەرەك» - دەدى پرەزيدەنت ق.ك. توقايەۆ.
ول ءۇشىن اسكەري-كولىك اۆياسياسى پاركىن تولىقتىرۋ ءىسىن، ىشكى ىستەردىڭ ارنايى وتريادتارىن نىعايتۋ، ارميانىڭ سوعىسقا دايىندىعىن كۇشەيتۋ، ۇلتتىق ۇلاننىڭ ساندىق ءارى ساپالىق مازمۇنىن كەڭەيتۋ شارالارىن، ىشكى كوشى-قون سالاسىن، شەكارا قىزمەتىن قولعا الۋ كەرەك ەكەنى انىق.
سونداي-اق، مامانداردىڭ جانە ساراپشىلاردىڭ پىكىرىنشە، بۇل قۇرىلىمدار اراسىنداعى ءوزارا ىس-ارەكەتتى، ءبىرىڭعاي ارەكەت الگوريتمدەرىن جولعا قويۋ ماسەلەسى دە وتە ماڭىزدى. بۇل رەتتە ءدىني ەكستريميزم، راديكالدى توپتاردىڭ پروبلەماسى دا وزەكتەنە تۇسۋدە، بۇل جاعدايعا ارنايى كوڭىل ءبولىپ، تالداۋ مەن ناقتى شەشىمدەر تەتىكتەرىن ويلاستىرعان ءجون.
ەكىنشىدەن، ول ەكونوميكالىق بلوك. قازىرگى تاڭدا تەڭسىزدىك ماسەلەسى، مۇلىكتىك جىكتەلۋ اسىرەسە بايقالا باستادى، سونىمەن بىرگە حالىقتىڭ الەۋمەتتىك پروبلەمالارى تولىق شەشىلمەي جاتقانى دا بارشاعا بەلگىلى.
بۇگىن مەملەكەت باسشىسى وسى پروبلەمالاردى اشىق كورسەتىپ، ۇكىمەتتى كوپشىلىكتىڭ كوكەيىندە جۇرگەن «سامۇرىق-قازىنا» قورى جانە باسقا دا ۇلتتىق كومپانيالاردىڭ ساتىپ الۋلارىنىڭ اشىقتىعىنا قاتىستى ماسەلەلەردى، جەكەشەلەندىرۋگە قاتىستى شەشىمدەرىنىڭ تولىق، اشىق ءارى ايقىن بولۋى، ەكونوميكاداعى وليگاپوليا، بيزنەستى قولداۋعا ارنالعا مەملەكەتتىك شارالاردىڭ كەمشىلىكتەرى، جەمقورلىق سەكىلدى مەملەكەتتىڭ دامۋىن تەجەيتىن پروبلەمالاردى شەشۋگە شاقىردى.
ۇشىنشىدەن؛ مەملەكەت قىزمەت پەن مەملەكەتتىك باسقارۋ جۇيەسىنە ارنالعان بلوك. وسى ۋاقىتقا دەيىن دە مەملەكەت قىزمەتكەرلەردىڭ تيىمدىلىگى تۋرالى ايتىلىپ كەلە جاتىر. مەملەكەت قىزمەتكەرلەر سانى 15 پايىزعا دەيىن قىسقارتىلدى. وسىمەن مەملەكەت باسشىسى قىسقارتۋدى توقتاتۋعا ۇسىندى. الايدا، بۇل سالاداعى ساپالىق، مازمۇندىق جۇمىسقا اسا نازار ءبولۋ قاجەتتىلىگى العا قويىلدى. مەريتوكراتيا قاعيداتىن دۇرىس ءتۇسىنىپ ونى ءتيىمدى، ءارى اقىلمەن ىسكە اسىرۋدى شاقىردى.
تورتىنشىدەن، الەۋمەتتىك سالانىڭ ساپالىق تۇرعىدا جاڭارۋى. ول البەتتە، حالىقتىڭ ءال-اۋقاتىن، تابىسىن كوتەرۋ، مەديسينالىق، ءبىلىم بەرۋ، الەۋمەتتىك يگىلىكتەرىن كەدەرگىسىز، تولىق مولشەردە پايدالانۋ، ولاردىڭ قولجەتىمدى بولۋىمەن بايلانىستى.
وسى رەتتە، پرەزيدەنت قاسىم-جومارت كەمەل ۇلى توقايەۆ الەۋمەتتىك كودەكستە وسنىڭ ءبارى سوڭعى احۋالدى، پاندەميانىڭ سالدارىن ەسكەرە وتىرىپ، كورىنىس تابۋ كەرەكتىگىنە اسا ءمان بەردى.
مەملەكەت باسشىسىنىڭ ايتۋىنشا، مەملەكەتتىك بيۋدجەتتىڭ 50 پايىزىنان كوبى الەۋمەتتىك سالاعا جۇمسالادى، دەگەنمەن ول ءالى دە جەتكىلىكسىز. بۇل ورايدا، دەنساۋلىق، بالالاردى قوعاۋ، ءبىلىم بەرۋ سەكىلدى سالالاردى قولداۋ ماقساتىندا قوعامدىق قور تەتىگىن پايدالانۋ تۋرالى پرەزيدەنتتىڭ ۇسىنىسى، مەنىڭ ويىمشا، وتە ورىندى، ءارى حالىقارالىق تاجىريبەگە ساي.
مەملەكەتتى ارى قاراي دامىتۋداعى وسى اۋقىمدى مىندەتتەردى اشىپ كورسەتكەن پرەزيدەنت ق.ك. توقايەۆتىڭ حالىقتىڭ جاعدايىن ءجىتى ءتۇسىنىپ، الەۋمەتتىك-ەكونوميكالىق سالالاردا بەلەڭ الىپ جاتقان كەمشىلىكتەر مەن قيىندىقتاردى ەڭسەرۋگە بار كۇشىن سالاتىنىنا بۇكىل قوعام سەنىم ارتادى.
