«بارلىق باعدارلامالىق قۇجاتتار حالقىمىزدىڭ ءال-اۋقاتى مەن ءومىر ءسۇرۋ ساپاسىن ارتتىرۋعا باعىتتالعان.
بۇل تاپسىرمالار قيىن كەزەڭدە، ۇنەمى تۋىنداپ وتىراتىن سىرتقى جانە ىشكى سىن-قاتەرلەر جاعدايىندا ىسكە اسىرىلدى.
دەگەنمەن جالپى قويىلعان مىندەتتەر جۇزەگە اسىرىلدى، ال ۇزاق مەرزىمدى جانە جۇيەلى تاپسىرمالار ورىندالۋ بارىسىندا»، — دەپ اتاپ ءوتتى ءاليحان سمايىلوۆ.
ايتا كەتەلىك، بيىلدان باستاپ جاڭا قازاقستاندا جەكە تۇلعالاردىڭ بانكروتتىعى تۋرالى زاڭ جۇمىس ىستەي باستادى.
بۇگىنگى تاڭدا 10 مىڭنان استام ازامات سوتتان تىس بانكروتتىق ءراسىمىن پايدالانعان. سمايىلوۆتىڭ اتاپ وتكەنىندەي بۇل حالىقتىڭ قارىز جۇكتەمەسىن جانە قوعامداعى الەۋمەتتىك شيەلەنىستى ازايتۋعا مۇمكىندىك بەرگەن.
پرەمەر بۇدان بولەك زاڭسىز ساتىپ الىنعان اكتيۆتەردىڭ ماسەلەسىن ءسوز ەتىپ، ولاردى مەملەكەتكە قايتارۋ ماقساتىندا ءتيىستى زاڭ قابىلدانعانىن ەسكە سالدى.
"بۇگىنگى تاڭدا دەمونوپوليزاسيالاۋ جونىندەگى كوميسسيا جۇمىسىنىڭ ناتيجەسى بويىنشا 16 كومپانيانىڭ اكسيالار پاكەتى مەن قاتىسۋ ۇلەسى، 7 عيمارات، 160 تەمىر جولدارى مەن نىسان، سونداي-اق اقشالاي قاراجات مەملەكەتتىك مەنشىككە قايتارىلدى.
جالپى، كولەڭكەلى ەكونوميكاعا قارسى ءىس-قيمىل بويىنشا قابىلدانعان شارالار سوڭعى 4 جىلدا كولەڭكەلى ەكونوميكانىڭ ۇلەسىن 27%-تەن 19%-كە دەيىن تومەندەتۋگە مۇمكىندىك بەردى"، – دەيدى سمايىلوۆ.
