پرەمەر-مينيستر ولجاس بەكتەنوۆ سولتۇستىك قازاقستان وبلىسىنا جۇمىس ساپارى اياسىندا ءوڭىردىڭ كوممۋنالدىق-ەنەرگەتيكالىق ينفراقۇرىلىمىن جاڭعىرتۋ جۇمىستارىنىڭ بارىسىمەن جانە جىلۋمەن ۇزدىكسىز قامتاماسىز ەتۋ بويىنشا قابىلدانىپ جاتقان شارالارمەن تانىستى، دەپ حابارلايدى Dalanews.kz.

جابدىقتاردى جوندەۋ جانە قالپىنا كەلتىرۋ بويىنشا ايتارلىقتاي جۇمىستار جۇرگىزىلگەن پەتروپاۆل 2-جەو-عا ەرەكشە نازار اۋدارىلدى. «سيەۆكازەنەرگو» اق باس ديرەكتورى قازاندىق اگرەگاتتارى مەن تۋربوگەنەراتورلار سياقتى نەگىزگى تەحنيكالىق قۇرالداردىڭ توزۋ دەڭگەيى 57،3% ەكەنىن حابارلادى. 2024 جىلى 2-جەو-دا №1، 9 قازاندىقتارى مەن №3، 6 تۋربينالارىنا كۇردەلى جوندەۋ جۇرگىزىلىپ، سونداي-اق ءتورت تۋربينانى جوندەۋ جۇمىستارى اياقتالعان.

سونىمەن قاتار بيىكتىگى 180 مەتر №1 ءتۇتىن مۇرجاسىنىڭ قۇرىلىسى اياقتالدى، ونى پايدالانۋعا بەرۋ جىل سوڭىنا جوسپارلانعان. سونداي-اق №3، 6، 11 ءۇش قازاندىقتا جانە №7 ءبىر تۋربينادا قالپىنا كەلتىرۋ جۇمىستارى جالعاسۋدا.

كاسىپورىن باسشىلىعىنىڭ اقپاراتىنا سايكەس، 2-جەو كومىر جانە مازۋتپەن تولىق قامتاماسىز ەتىلگەن. قازىرگى ۋاقىتتا قوردا 183 مىڭ توننا كومىر، 1833 توننا مازۋت بار. وتىن جەتكىزۋ كەستەگە سايكەس جۇزەگە اسىرىلۋدا.

جىلۋ ەلەكتر ورتالىقتارىندا ۋاقتىلى جۇرگىزىلگەن دايىندىق پەن قالپىنا كەلتىرۋ جۇمىستارى قالانىڭ جىلۋمەن قامتۋ جابدىقتارى مەن جۇيەلەرىنىڭ تۇراقتى جۇمىسىن قامتاماسىز ەتۋگە مۇمكىندىك بەردى. اعىمداعى جىلىتۋ ماۋسىمى شتاتتىق رەجيمدە وتۋدە. ق ر ەنەرگەتيكا مينيسترلىگى بيىل نىساندى ءقاۋىپتىڭ "قىزىل" ايماعىنان "سارى" ايماققا شىعارۋدى جوسپارلاپ وتىر.

كاسىپورىندا پرەمەر-مينيسترگە "ەنەرگەتيكالىق جانە كوممۋنالدىق سەكتورلاردى جاڭعىرتۋ" ۇلتتىق جوباسىنىڭ ىسكە اسىرىلۋ بارىسى تۋرالى باياندالدى. بۇگىندە سولتۇستىك قازاقستان وبلىسىندا 363 مەديسينالىق مەكەمەنى، 585 وقۋ ورنىن، 156 مادەنيەت جانە سپورت نىسانىن، سونداي-اق 1435 كوپپاتەرلى تۇرعىن ءۇيدى جىلۋمەن قامتاماسىز ەتەتىن 490 قازاندىق جۇمىس ىستەيدى.

"جىلۋمەن ۇزدىكسىز قامتاماسىز ەتۋ مەملەكەت باسشىسىنىڭ ەرەكشە باقىلاۋىندا. سوڭعى ءبىر جىلدا ەلىمىزدەگى 55 جىلۋ كوزى جاڭعىرتىلدى. ۇكىمەت وسى باعىتتا ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبانى ىسكە اسىرۋدا. جۇرگىزىلگەن جۇمىستاردىڭ ناتيجەسى بويىنشا ينجەنەرلىك جەلىلەردىڭ توزۋ دەڭگەيى 40%-عا دەيىن تومەندەپ، ەلەكتر ەنەرگياسىن ءوندىرۋ قۋاتى 7،3 گۆت-قا ارتادى دەپ بولجانۋدا. سونىمەن قاتار جوبالار 3،5 مىڭ جۇمىس ورنىن اشۋدى كوزدەيدى"، — دەپ اتاپ ءوتتى پرەمەر-مينيستر.