Premer-ministr Oljas Bektenov Soltústik Qazaqstan oblysyna jumys sapary aiasynda óńirdiń kommýnaldyq-energetikalyq infraqurylymyn jańǵyrtý jumystarynyń barysymen jáne jylýmen úzdiksiz qamtamasyz etý boiynsha qabyldanyp jatqan sharalarmen tanysty, dep habarlaidy Dalanews.kz.
Jabdyqtardy jóndeý jáne qalpyna keltirý boiynsha aitarlyqtai jumystar júrgizilgen Petropavl 2-JEO-ǵa erekshe nazar aýdaryldy. «SevKazEnergo» AQ bas direktory qazandyq agregattary men týrbogeneratorlar siiaqty negizgi tehnikalyq quraldardyń tozý deńgeii 57,3% ekenin habarlady. 2024 jyly 2-JEO-da №1, 9 qazandyqtary men №3, 6 týrbinalaryna kúrdeli jóndeý júrgizilip, sondai-aq tórt týrbinany jóndeý jumystary aiaqtalǵan.
Sonymen qatar biiktigi 180 metr №1 tútin murjasynyń qurylysy aiaqtaldy, ony paidalanýǵa berý jyl sońyna josparlanǵan. Sondai-aq №3, 6, 11 úsh qazandyqta jáne №7 bir týrbinada qalpyna keltirý jumystary jalǵasýda.
Kásiporyn basshylyǵynyń aqparatyna sáikes, 2-JEO kómir jáne mazýtpen tolyq qamtamasyz etilgen. Qazirgi ýaqytta qorda 183 myń tonna kómir, 1833 tonna mazýt bar. Otyn jetkizý kestege sáikes júzege asyrylýda.
Jylý elektr ortalyqtarynda ýaqtyly júrgizilgen daiyndyq pen qalpyna keltirý jumystary qalanyń jylýmen qamtý jabdyqtary men júieleriniń turaqty jumysyn qamtamasyz etýge múmkindik berdi. Aǵymdaǵy jylytý maýsymy shtattyq rejimde ótýde. QR Energetika ministrligi biyl nysandy qaýiptiń "qyzyl" aimaǵynan "sary" aimaqqa shyǵarýdy josparlap otyr.
Kásiporynda Premer-ministrge "Energetikalyq jáne kommýnaldyq sektorlardy jańǵyrtý" ulttyq jobasynyń iske asyrylý barysy týraly baiandaldy. Búginde Soltústik Qazaqstan oblysynda 363 meditsinalyq mekemeni, 585 oqý ornyn, 156 mádeniet jáne sport nysanyn, sondai-aq 1435 kóppáterli turǵyn úidi jylýmen qamtamasyz etetin 490 qazandyq jumys isteidi.
"Jylýmen úzdiksiz qamtamasyz etý Memleket basshysynyń erekshe baqylaýynda. Sońǵy bir jylda elimizdegi 55 jylý kózi jańǵyrtyldy. Úkimet osy baǵytta energetikalyq jáne kommýnaldyq sektorlardy jańǵyrtý jónindegi ulttyq jobany iske asyrýda. Júrgizilgen jumystardyń nátijesi boiynsha injenerlik jelilerdiń tozý deńgeii 40%-ǵa deiin tómendep, elektr energiiasyn óndirý qýaty 7,3 GVt-qa artady dep boljanýda. Sonymen qatar jobalar 3,5 myń jumys ornyn ashýdy kózdeidi", — dep atap ótti Premer-ministr.
