پرەمەر-مينيستر ولجاس بەكتەنوۆ شەتەلدىك ينۆەستيسيالار تارتۋ ماسەلەسى بويىنشا كەڭەس وتكىزدى، دەپ حابارلايدى Dalanews.kz.
كەڭەسكە باس پروكۋرور بەرىك اسىلوۆ، ۇكىمەت باسشىلىعى، مينيسترلەر، ءوڭىر اكىمدەرى، "سامۇرىق-قازىنا" ءۇاق، "بايتەرەك ۇيح، Kazakh Invest ۇك، "اتامەكەن ۇكپ باسشىلىعى قاتىستى.
"ءاربىر شەتەلدىك نەمەسە قازاقستاندىق ينۆەستور ءوز مۇددەسى قورعالعانىنا، داۋ ءادىل تۇردە شەشىلەتىنىنە، ال مەملەكەتتىك ينستيتۋتتار اشىق ەرەجەلەر شەڭبەرىندە ارەكەت ەتەتىنىنە سەنىمدى بولۋعا ءتيىس. كوپتەگەن ماسەلەنىڭ ءتۇپ-تامىرى بيۋروكراتيادا جانە جەرگىلىكتى جەرلەردەگى پروسەستەر سوزبالاڭعا سالىنۋىندا جاتىر. ەكونوميكامىزعا ينۆەستيسيا سالۋعا دايىن ينۆەستوردىڭ بىرنەشە اي بويى قاراپايىم تەحنيكالىق شارتتاردى نەمەسە جەرگە قۇقىق بەلگىلەيتىن قۇجاتتاردى الا الماۋىنا جول بەرىلمەيدى. بۇل - ەل ەكونوميكاسى ءۇشىن تىكەلەي شىعىن"، - دەدى ولجاس بەكتەنوۆ.
پرەمەر-مينيستر Kazakh Invest ۇك جانە اكىمدىكتەر قىزمەتىن كەمشىلىكتەرى، ماقۇلدانعان جوبالاردى جۇزەگە اسىرۋعا كەدەرگى كەلتىرگەنى ءۇشىن سىنعا الدى. بۇگىندە وڭىرلەرگە جۇزەگە اسىرۋعا ۇسىنىلعان 25 جوبانىڭ ۇشەۋى عانا بەلسەندى ىسكە اسىرىلىپ جاتىر.
Kazakh Invest ۇك اق باسقارما ءتوراعاسى سۇلتانعالي كەنجەقۇلوۆقا ەسكەرتۋ جاسالدى.
