قىزىق كورىپ، مەن دە ورنىمنان تۇردىم دا سول جەردەن ءوتىپ بارا جاتقان سىڭاي تانىتىپ، ءجاي عانا ىشكە قاراي كوز قيىعىمدى سالدىم، سويتسەم داستارحاندا جالعىز ءوزى عانا وتىر. قاسىندا جان بالاسى جوق. كىشكەنتاي عانا داستارحاندى ءتۇرلى تاعاممەن بەزەندىرىپ تاستاپتى.
ۆاگونداعى بۇكىل ايەلدەر سول قىزدىڭ تۇسىنىكسىز ارەكەتىنە تاڭ قالىسىپ، سونى قىزىق كورىپ سىرتتاي تاماشالاۋدا. سۇلۋ قىز ۇستىنە بۇكىل ادەمى كيىمىن كيىپ العان، بويانىپ جاسانعانى تاعى بار. "مىنا سۇلۋدىڭ داستارحانىندا قۇستىڭ سۇتىنەن باسقاسىنىڭ ءبارى بار. ءبىراق ونى ىشىپ-جەيتىن وزىنەن باسقا ءتىرى جان جوق"، – دەپ ءبارى بىر-بىرىنە ءازىل ارالاس كۇبىرلەسىپ جاتتى. قىزدىڭ وزىنەن سۇرايىن دەسە، كوزى جاسقا تولىپ، ءتىپتى بىزگە جاۋاپ بەرەتىن جاعدايدا ەمەس.
...ارادان جارتى ساعات ءوتتى. ءبىر كەزدە الگى قىز قولىن كوتەرىپ، ىشتەي دۇعا جاساپ بەتىن سيپادى دا داستارحاننان تۇردى. بارىمىزگە ءبىر-بىر بولىكتەن تورت تاراتىپ، سونىمەن قاتار، سالات، تاماقتان اۋىز تيگىزدى.
اڭ-تاڭ بولعان كوپشىلىك قىزدان جاعدايدىڭ ءمان-جايىن سۇراستىرىپ جاتىر. سويتسەك، سول كۇنى – الگى قىزدىڭ ءبىر جىل بۇرىن قايتىس بولعان اناسىنىڭ تۋعان كۇنى ەكەن. اناسىنىڭ قايتىس بولعانىنان كەيىنگى ءبىرىنشى تۋعان كۇنىن جولدا وتكىزىپتى. ءتىرى كۇنىندە اناسىنا ءار تۋعان كۇنىندە ءوز قولىمەن تورت ءپىسىرۋدى ادەتكە اينالدىرعان بويجەتكەن، بۇل جولى دا ءوز قولىمەن پىسىرگەن تورتىن جولعا بىرگە الا شىعىپتى...
پەندەمىز عوي، ماسەلەنىڭ انىق-قانىعىن بىلمەي جاتىپ، ويلانباي ارنارسەنى اڭگىمە قىلدىق. اناسىن ساعىنعان قىزدىڭ سەزىمىن كۇلكىگە اينالدىرعان ءبارىمىز ۇيالىپ قالدىق.
الگى قىز بارلىق ادامعا جەكە-جەكە دامنەن ۇلەس تاراتىپ بولعان سوڭ، ءوز ورنىنا جاتا كەتىپ، سول جاتقاننان جاستىق قۇشاقتاپ ۇزاق ۋاقىت بويى ەبىل-سەبىل جىلاۋمەن بولدى.
ءبارىمىز تراگەديالىق كينودان ءۇزىندى كورگەندەي قاتتى اسەردىڭ قۇشاعىندا بولدىق. ۆاگوندا وسى كورىنىسكە كۋا بولعان ادامداردىڭ اراسىنان ەگىلىپ كوزىنە جاس الماعان جان قالمادى-اۋ.
قىزدى قاتتى ايادىم. پەندەنىڭ اياعانى نە بولسىن، اللانىڭ اياعانىن تىلەدىم. تاعدىرلار ءار الۋان ەكەن. ەشكىمدى اللا اتا-اناسىنان ەرتە ايىرماسان. قىزدىڭ جاس ۇيىرىلگەن جانارى الىگە دەيىن كوز الدىمنان كەتەر ەمەس.
سانجار عۇلاما
https://dalanews.kz/14377
