ق ر ءسىم باسپا ءسوز قىزمەتىنىڭ باسشىسى ءانۋار جايناقوۆ ءوزىنىڭ فەيسبۋك پاراقشاسىندا سانكت-پەتەربۋرگتەگى تەراكتىگە قازاقستاندىقتىڭ قاتىسى بولۋى مۇمكىن دەگەن اقپاراتقا قاتىستى پىكىرىن ءبىلدىردى.

«كەيبىر باق-تا 3 ءساۋىر كۇنى سانت-پەتەربۋرگتەگى تەراكتىنى ورىنداۋشى  قازاقستان ازاماتى بولۋى مۇمكىن دەگەن اقپارات پايدا بولدى. 3 ءساۋىر كۇنى جەرگىلىكتى ۋاقىتپەن 21:06-دا سانكت-پەتەربۋرگتەگى قازاقستاننىڭ باس كونسۋلىنا الماتىلىق يرينا ارىشيەۆادان تەلەفون قوڭىراۋى كەلىپ ءتۇستى. ول جارىلىس تۋرالى اقپاراتتان كەيىن سانكت-پەتەربۋرگ ەكونوميكالىق ۋنيۆەرسيتەتىنىڭ 3-كۋرسىندا وقيتىن ءوزىنىڭ ۇلى، 09.08.1996 جىلى تۋعان ارىشيەۆ ماكسيم ۆيتاليەۆيچتىڭ بايلانىسقا شىقپاي قالعانىن ايتقان. سانكت-پەتەربۋرگتە م.ارىشيەۆ ءوزىنىڭ دوس قىزىمەن، اپكەسىمەن جانە جەزدەسىمەن بىرگە تۇرادى. تۋىستارىنىڭ حابارلاۋىنشا، ماكسيم سوڭعى رەت 3 ءساۋىر كۇنى 14:30-دا ساباقتان شىعىپ، سەننايا پلوششاد ستانساسىنان تەحنولوگيالىق ينستيتۋت ارقىلى ۇيگە قايتىپ كەلە جاتقانىن حابارلاعان»،  – دەپ جازدى ءانۋار جايناقوۆ.

قازىرگى ۋاقىتتا سانكت-پەتەربۋرگتەگى قازاقستاننىڭ باس كونسۋلى تەراكتى قۇرباندارىن تانۋ جۇرگىزىلىپ جاتقان اۋرۋحانادا. استانا ۋاقىتىمەن تاڭعى ساعات 5.30 جاعدايىندا قۇرباندار اراسىندا قازاقستان ازاماتتارىنىڭ جوقتىعى انىقتالدى. "ماكسيم ارىشيەۆتىڭ سانكت-پەتەربۋرگتەگى تەراكتىگە قاتىسى بار دەپ ايتۋعا ءالى ەرتە. ونى ىزدەستىرۋ جۇمىستارى جالعاسىپ جاتىر». قازا تاپقانداردىڭ تۋىستارى مەن جاقىندارىنا قايعىرا كوڭىل ايتامىن»، – دەدى ق ر ءسىم باسپا ءسوز قىزمەتىنىڭ باسشىسى ءانۋار جايناقوۆ.

 

دەرەككوزى: قازاقپارات