پەريزات قايراتقا قاتىستى ءوتىپ جاتقان قىلمىستىق ءىس بويىنشا سوت پروسەسى كەزىندە تىكەلەي ەفيرگە شىعۋعا تىيىم سالىندى. بۇل تۋرالى استاناداعى قىلمىستىق ىستەر جونىندەگى اۋدانارالىق سوتتىڭ سۋدياسى سابىرجان كاريموۆ مالىمدەدى، دەپ حابارلايدى Dalanews.kz.

“سوت پروسەسى اياقتالعانشا قاتىسۋشىلار مەن جۋرناليستەرگە سوت زالىنان، سونداي-اق سوت عيماراتىنان الەۋمەتتىك جەلىلەر ارقىلى تىكەلەي ەفير جۇرگىزۋگە تىيىم سالىنادى. بۇل Zoom ارقىلى قوسىلاتىندارعا دا قاتىستى”، – دەدى سۋديا.

سونداي-اق جۋرناليستەردى نەگىزگى سوت زالىنان شىعارىپ، ولاردى پروسەستى ارنايى باسپا ءسوز ورتالىعىنان باقىلاۋعا جىبەردى.

“بانكتىك قۇپيالار مەن كونفيدەنسيالدى اقپارات جاريالانعان ساتتەردە جۋرناليستەردى زالدان شىعارىپ وتىرۋعا تۋرا كەلەدى. بۇل ۋاقىتتى كوپ الادى”، — دەدى سۋديا.

ايتا كەتەيىك، استانادا پەريزات قايرات پەن اناسىنا قاتىستى سوت باستالدى. بۇعان دەيىن كۇدىكتى تەرگەۋ يزولياتورىندا وزىنە كۇش قولدانىلعانىن مالىمدەگەن ەدى. بۇل تۋرالى Tengrinews.kz جازدى.

"مورالدىق تۇرعىدان قاتتى شارشادىم. ەندى عانا تەرگەۋ يزولياتورىنىڭ قىزمەتكەرلەرى تاراپىنان ۇرىپ-سوعۋ دەرەگى تۋرالى اشىق ايتا الامىن. استانا قالالىق پروكۋراتۋراسى بۇل دەرەك بويىنشا قىلمىستىق ءىس قوزعادى. ءقازىر جاعدايىم ءبىرشاما جاقساردى"، – دەدى پەريزات قايرات.

جۋرناليستەر ونىڭ قۇقىق قورعاۋ ۇيىمدارىنان كومەك سۇراعان-سۇراماعانىن ناقتىلادى.

"قانداي ءوتىنىش تۇسىرسەم دە، بۇگىنگە دەيىن ماعان قوعامدىق قورعاۋشى تاعايىندالعان جوق. انامدى دا العاش رەت بۇگىن عانا كورىپ تۇرمىن. وعان كۇدىكتى مارتەبەسى تەك 18 ناۋرىزدا بەرىلدى. مەنىڭ بارلىق زاڭدى قۇقىعىم اياق-استى ەتىلدى"، – دەپ كوزىنە جاس الدى ايىپتالۋشى.

سونداي-اق پەريزات قايرات اشىق سوت پروسەسىنە قارسى ەمەستىگىن ايتتى. ءبىراق جۋرناليستەردەن اناسىن كامەراعا تۇسىرمەۋدى سۇرادى.

كەيىنىرەك پەريزات قايراتقا قاتىستى سوت وتىرىسى قالاي وتەتىنى بەلگىلى بولدى.

"پەريزات قايراتتىڭ الدىن الا تىڭداۋداعى ءوتىنىشى قارالدى (...) سوت سوت پروسەسىن جابىق تۇردە وتكىزۋ تۋرالى ءوتىنىشتى ءىشىنارا قاناعاتتاندىرۋ تۋرالى قاۋلى شىعاردى. سوت وتىرىسى 2025 جىلى 14 شىلدەدە ساعات 10:00-گە بەلگىلەندى"، - دەدى سۋديا.