العاشقى ءدارىس باۋىرجان مومىش ۇلى اتىنداعى مەكتەپتە ءوتتى. 11 قىركۇيەككە دەيىن شاھارداعى 30-عا جۋىق قازاق مەكتەپتەرىندە دە ۇيىمداستىرۋ جوسپارلانعان. ءدارىستى بەلگىلى ابايتانۋشى، جىرشى دانيال اسەنوۆ جۇرگىزۋدە.
- قالالىق ءبىلىم بەرۋ ءبولىمىنىڭ قولداۋىمەن «ولمەيتۇعىن ارتىنا ءسوز قالدىرعان» جوباسىن باستادىق، - دەدى دانيال اسەنوۆ. – جوبا بارىسىندا اباي ءدارىسى وتەدى. بۇندا مەن ءوزىم ءبىر ءسوز قوسپاي، تەك ابايدىڭ سوزدەرىن جەتكىزەمىن.
ماقساتىمىز – اباي قۇنانبايەۆ شىعارماشىلىعى تۋرالى وقۋشىلاردىڭ ءبىلىمىن كەڭەيتۋ، اقىننىڭ ليريكالىق ولەڭدەرى مەن قارا سوزدەرىن تانىستىرۋ، تۋعان حالقىنىڭ تاريحى مەن مادەنيەتىنە دەگەن سۇيىسپەنشىلىگىن ارتتىرۋ بولىپ تابىلادى.
وسى وقۋ جىلىمەن، اباي جىلى باستالىپ كەتتى. مەن 25 جىلدان بەرى ابايدى ناسيحاتتاپ كەلە جاتىرمىن. بىلتىر «اۋىلعا اباي كەلدى» دەگەن جوبا وتكىزدىك. 50-گە جۋىق اۋىلعا باردىم. تۇرعىندار ابايدى كورگەندەي قۋانىپ جاتتى. كەڭەس كەزىندە اباي از ناسيحاتتالدى. قارا سوزدەرى وقىلمادى. بىر-ەكى ولەڭى عانا تارالاتىن. ءقازىر جاستاردىڭ كوبى ابايدىڭ ولەڭىن ايتقان كەزدە قۋانىپ قالامىن.
ءدارىس بارىسىندا بەلگىلى جىرشى اقىننىڭ ءومىرى مەن شىعارماشىلىعى جايلى ايتىپ، ولەڭدەرى مەن قارا سوزدەرىنەن ۇزىندىلەر وقىدى.
اقىننىڭ 17ء-شى قارا ءسوزىن وقىپ، وقۋشىلارعا اقىل مەن قايراتتى جىلى جۇرەككە باعىندىرۋعا كەڭەس بەردى.
باۋىرجان مومىش ۇلى اتىنداعى مەكتەپتىڭ 10-سىنىپ وقۋشىسى باقبەرگەن داۋان (جوعارىدا سۋرەتتە) ابايدىڭ 140-تان استام ولەڭىن جاتقا بىلەدى.
- ۇلى اقىننىڭ ولەڭدەرىن 1-سىنىپتان بەرى جاتتاپ كەلەمىن، - دەدى باقبەرگەن داۋان. – ولەڭدەرى، پوەمالارى مەن قارا سوزدەرىنەن 140-تان استام تۋىندىنى جاتتادىم. اباي اتامىزدىڭ سوزدەرى، ايتقان وسيەتتەرى ومىردە ءوز پايداما جاراپ جاتادى. سوزدەرىنە قۇلاق اسىپ، ءىس جاسايمىن. بۇگىن دانيال اعامىزدىڭ كەلىپ، قاتارلاستارىما وسىنداي ءدارىس وتكىزىپ جاتقانىنا ريزامىن.
مەكتەپ ديرەكتورىنىڭ وقۋ ءىسى جونىندەگى ورىنباسارى گاۋحار بەكمۋرزينوۆا ءبىلىم ورداسىندا اباي قۇنانبايەۆتىڭ مەرەيتويىنا وراي وزگە دە شارالار اتقارىلىپ جاتقانىن ايتتى.
- مەكتەبىمىزدە اقىنعا ارنالعان سىنىپ ساعاتتارى وتۋدە، - دەدى گاۋحار بەكمۋرزينوۆا. – وسى ايدا مەكتەپشىلىك اباي وقۋلارىن وتكىزۋ جوسپارلانعان. وعان 20-عا جۋىق وقۋشى دايىندالىپ ءجۇر. سونداي-اق پرەزيدەنتىمىز قوستاعان اباي ولەڭدەرىن وقۋ چەللەندجىنە 5 پەداگوگىمىز بەن 20-عا جۋىق وقۋشىمىز قاتىستى. وعان شاكىرتتەرىمىز ءالى دە قاتىساتىن بولادى.
