Alǵashqy dáris Baýyrjan Momyshuly atyndaǵy mektepte ótti. 11 qyrkúiekke deiin shahardaǵy 30-ǵa jýyq qazaq mektepterinde de uiymdastyrý josparlanǵan. Dáristi belgili abaitanýshy, jyrshy Daniial Ásenov júrgizýde.
- Qalalyq bilim berý bóliminiń qoldaýymen «Ólmeituǵyn artyna sóz qaldyrǵan» jobasyn bastadyq, - dedi Daniial Ásenov. – Joba barysynda Abai dárisi ótedi. Bunda men ózim bir sóz qospai, tek Abaidyń sózderin jetkizemin.
Maqsatymyz – Abai Qunanbaev shyǵarmashylyǵy týraly oqýshylardyń bilimin keńeitý, aqynnyń lirikalyq óleńderi men qara sózderin tanystyrý, týǵan halqynyń tarihy men mádenietine degen súiispenshiligin arttyrý bolyp tabylady.
Osy oqý jylymen, Abai jyly bastalyp ketti. Men 25 jyldan beri Abaidy nasihattap kele jatyrmyn. Byltyr «Aýylǵa Abai keldi» degen joba ótkizdik. 50-ge jýyq aýylǵa bardym. Turǵyndar Abaidy kórgendei qýanyp jatty. Keńes kezinde Abai az nasihattaldy. Qara sózderi oqylmady. Bir-eki óleńi ǵana taralatyn. Qazir jastardyń kóbi Abaidyń óleńin aitqan kezde qýanyp qalamyn.
Dáris barysynda belgili jyrshy aqynnyń ómiri men shyǵarmashylyǵy jaily aityp, óleńderi men qara sózderinen úzindiler oqydy.
Aqynnyń 17-shi qara sózin oqyp, oqýshylarǵa aqyl men qairatty jyly júrekke baǵyndyrýǵa keńes berdi.
Baýyrjan Momyshuly atyndaǵy mekteptiń 10-synyp oqýshysy Baqbergen Daýan (joǵaryda sýrette) Abaidyń 140-tan astam óleńin jatqa biledi.
- Uly aqynnyń óleńderin 1-synyptan beri jattap kelemin, - dedi Baqbergen Daýan. – Óleńderi, poemalary men qara sózderinen 140-tan astam týyndyny jattadym. Abai atamyzdyń sózderi, aitqan ósietteri ómirde óz paidama jarap jatady. Sózderine qulaq asyp, is jasaimyn. Búgin Daniial aǵamyzdyń kelip, qatarlastaryma osyndai dáris ótkizip jatqanyna rizamyn.
Mektep direktorynyń oqý isi jónindegi orynbasary Gaýhar Bekmýrzinova bilim ordasynda Abai Qunanbaevtyń mereitoiyna orai ózge de sharalar atqarylyp jatqanyn aitty.
- Mektebimizde aqynǵa arnalǵan synyp saǵattary ótýde, - dedi Gaýhar Bekmýrzinova. – Osy aida mektepshilik Abai oqýlaryn ótkizý josparlanǵan. Oǵan 20-ǵa jýyq oqýshy daiyndalyp júr. Sondai-aq prezidentimiz qostaǵan Abai óleńderin oqý chellendjine 5 pedagogymyz ben 20-ǵa jýyq oqýshymyz qatysty. Oǵan shákirtterimiz áli de qatysatyn bolady.
