پاۆلوداردا دارىگەرلەر اسقازانىنان ۇزىندىعى شامامەن ءۇش سانتيمەتر بولاتىن بۇراندانى جۇتىپ قويعان ءبىر جاسقا تولماعان سابيگە وتا جاساپ، بوگدە زاتتى الىپ شىقتى، دەپ حابارلايدى Dalanews.kz.

بۇل تۋرالى 6 ناۋرىز، جۇما كۇنى پاۆلودار وبلىستىق بالالار اۋرۋحاناسىنىڭ انەستەزيولوگ-رەانيماتولوگى مەرحات امرەنوۆ Instagram پاراقشاسىندا حابارلادى.

دارىگەردىڭ ايتۋىنشا، بالا ۇيدە ويناپ ءجۇرىپ بۇراندانى جۇتىپ قويعان.

«پاتەردە جوندەۋ جۇمىستارى ءجۇرىپ جاتقان. بولجام بويىنشا، ءسابي ەدەندە جاتقان بۇراندانى الىپ، اۋزىنا سالعان»، – دەدى امرەنوۆ.

ءسابيدى اۋرۋحاناعا دەر كەزىندە جەتكىزگەن. اۋرۋحاناعا تۇسكەننەن كەيىن دارىگەرلەر قىسقاشا تەكسەرۋ جۇرگىزىپ، بوگدە زاتتىڭ ءارى قاراي جىلجىپ كەتۋىنە جول بەرمەۋ ءۇشىن بىردەن پروسەدۋرانى باستاعان.

ماماننىڭ سوزىنشە، مۇنداي زاتتار اسا ءقاۋىپتى بولىپ سانالادى.

«بالالاردىڭ اسقازانىنان ءبىز نەنى عانا شىعارمادىق: باتارەيكالار، ماگنيتتەر، تيىندار. ءبىراق ەڭ ءقاۋىپتىسى – بۇراندالار مەن وزدىگىنەن بۇرالاتىن شەگەلەر. ولاردى الۋ كەزىندە دارىگەر بارىنشا مۇقيات ءارى اسا زەيىندى بولۋى كەرەك. ءبىر عانا قاتە قوزعالىس وڭەشتى باسىنان اياعىنا دەيىن جاراقاتتاپ، بالانى ءومىر بويىنا مۇگەدەك ەتىپ قالدىرۋى مۇمكىن»، – دەدى ول.

امرەنوۆ پروسەدۋرا كەزىندە بالانىڭ جاقسى سەداتيۆتى كۇيدە بولۋى ماڭىزدى ەكەنىن ايتتى. ويتكەنى كەز كەلگەن كەرنەۋ نەمەسە قوزعالىس بوگدە زاتتى الۋدى قيىنداتادى.

«ۇزىندىعى شامامەن ءۇش سانتيمەتر بولاتىن بۇراندانى ەندوسكوپيالىق ادىسپەن الىپ شىقتىق. پروسەدۋرا شامامەن 30 مينۋتقا سوزىلدى. ءقازىر بالا ويانىپ، ەسىن جيدى، حيرۋرگيا بولىمشەسىنىڭ پالاتاسىنا اۋىستىرىلدى»، – دەپ قوستى دارىگەر.

قازىرگى ۋاقىتتا ءسابيدىڭ جاعدايى جاقسى، ونىڭ ءومىرى مەن دەنساۋلىعىنا ءقاۋىپ ءتونىپ تۇرعان جوق.