Pavlodarda dárigerler asqazanynan uzyndyǵy shamamen úsh santımetr bolatyn burandany jutyp qoıǵan bir jasqa tolmaǵan sábıge ota jasap, bógde zatty alyp shyqty, dep habarlaıdy Dalanews.kz.

Bul týraly 6 naýryz, juma kúni Pavlodar oblystyq balalar aýrýhanasynyń anestezıolog-reanımatology Merhat Ámrenov Instagram paraqshasynda habarlady.

Dárigerdiń aıtýynsha, bala úıde oınap júrip burandany jutyp qoıǵan.

«Páterde jóndeý jumystary júrip jatqan. Boljam boıynsha, sábı edende jatqan burandany alyp, aýzyna salǵan», – dedi Ámrenov.

Sábıdi aýrýhanaǵa der kezinde jetkizgen. Aýrýhanaǵa túskennen keıin dárigerler qysqasha tekserý júrgizip, bógde zattyń ári qaraı jyljyp ketýine jol bermeý úshin birden prosedýrany bastaǵan.

Mamannyń sózinshe, mundaı zattar asa qaýipti bolyp sanalady.

«Balalardyń asqazanynan biz neni ǵana shyǵarmadyq: batareıkalar, magnıtter, tıyndar. Biraq eń qaýiptisi – burandalar men ózdiginen buralatyn shegeler. Olardy alý kezinde dáriger barynsha muqıat ári asa zeıindi bolýy kerek. Bir ǵana qate qozǵalys óńeshti basynan aıaǵyna deıin jaraqattap, balany ómir boıyna múgedek etip qaldyrýy múmkin», – dedi ol.

Ámrenov prosedýra kezinde balanyń jaqsy sedatıvti kúıde bolýy mańyzdy ekenin aıtty. Óıtkeni kez kelgen kerneý nemese qozǵalys bógde zatty alýdy qıyndatady.

«Uzyndyǵy shamamen úsh santımetr bolatyn burandany endoskopıalyq ádispen alyp shyqtyq. Prosedýra shamamen 30 mınýtqa sozyldy. Qazir bala oıanyp, esin jıdy, hırýrgıa bólimshesiniń palatasyna aýystyryldy», – dep qosty dáriger.

Qazirgi ýaqytta sábıdiń jaǵdaıy jaqsy, onyń ómiri men densaýlyǵyna qaýip tónip turǵan joq.