پاۆلوداردا مەملەكەتتىك ساتىپ الۋ سالاسىنداعى زاڭبۇزۋشىلىقتار ءۇشىن 19 لاۋازىمدى تۇلعا اكىمشىلىك جاۋاپقا تارتىلدى، دەپ حابارلايدى Dalanews.kz.
پاۆلوداردا "مەملەكەتتىك ساتىپ الۋ تۋرالى" زاڭ جۇيەلى تۇردە بۇزىلعان.
"تالاپتارعا سايكەس تاپسىرىس بەرۋشىلەر 30 كۇن ىشىندە جەتكىزۋشىنى مەملەكەتتىك ساتىپ الۋدىڭ ادال قاتىسۋشىسى ەمەس دەپ تانۋ تۋرالى تالاپ ارىزبەن سوتقا جۇگىنۋگە مىندەتتى. ال مەملەكەتتىك مەكەمەلەر مەن كاسىپورىندار بۇل مەرزىمدى بىرنەشە رەت ەلەمەگەن. مۇنداي ارەكەتسىزدىك جەتكىزۋشىلەردىڭ جاۋاپكەرشىلىكتەن جالتارۋىنا مۇمكىندىك بەرەدى"، - دەپ جازىلعان حابارلامادا.
سوت "KAZ SERVICE PVL" جشس-عا قاتىستى "اقسۋ قالاسىنىڭ مەكتەپ-ليسەيى" كمم-نىڭ تالابىن قابىلدامادى. سەبەبى مەكەمە سەرىكتەستىكتىڭ مىندەتتەمەنى بۇزعانىن 2024 جىلعى تامىزدا بىلگەن، ءبىراق تالاپتى بەس ايدان كەيىن عانا بەرگەن.
