شىمكەنتتە اسا ءىرى كولەمدە پارا بەرمەك بولدى دەگەن كۇدىككە ىلىنگەن ماقسۇت يساحوۆقا قاتىستى سوت وتىرىسى باستالدى. ەكس-شەندى وزىنە تاعىلعان ايىپتى مويىندامايدى. ءبىرىنشى تىڭدالىمدا اكىمنىڭ بۇرىنعى ورىنباسارى جاعدايعا بايلانىستى ءوز ءۋاجىن ايتتى، - دەپ حابارلايدى Dalanews.kz otyrar.kz-كە سىلتەپ.
ماقسۇت يساحوۆ 2023 جىلى 20 شىلدەدە لاۋازىمىن اسىرا پايدالاندى دەگەن كۇدىكپەن ۇستالعان ەدى. الايدا قىلمىس قۇرامى انىقتالماۋىنا بايلانىستى 2 رەت ءىس توقتاتىلدى. ال سول جىلدىڭ سوڭىندا ول اسا ءىرى كولەمدە پارا بەردى دەگەن كۇدىكپەن قاماۋعا الىندى.
"2020 جىلى 685 ملن. تەڭگەگە باعالانعان مەملەكەتتىك ساتىپ الۋ كونكۋرسىن "كورپوراسيا "سيتي-ستروي" ءجشس-ى جەڭىپ العان. الايدا بۇعان كەلىسپەۋىنە بايلانىستى "ستارت-ستروي" سوتقا شاعىم تۇسىرگەن. ال يساحوۆ جەكە كومپانيا شاعىمىنان باس تارتسا، وعان باسقا تەندەر ۇتىپ بەرەتىنىن ايتىپ 187 ملن. تەڭگە كولەمىندە قاراجات سۇراعان. الايدا ءىستى "ستارت-ستروي" ءجشس-ى جەڭىپ شىعىپ، قوسالقى مەردىگەر رەتىندە "سيتي-ستروي" ءجشس-ى بەكىتىلگەن. سوتتالۋشىعا ايتۋلى جايت بويىنشا ءىس قوزعالاتىن بولعان سوڭ، ول ۇلتتىق قاۋىپسىزدىك كوميتەتىنىڭ شىمكەنت قالاسى بويىنشا دەپارتامەنتى باسشىسىنىڭ ورىنباسارىن پارا الۋعا كوندىرىپ، ءىستى جاسىرماق بولدى دەگەن ايىپ تاعىلىپ وتىر"، - دەدى پروكۋرور.
ال پارا بەرۋ دەرەگى بويىنشا كۇدىكتى جاعداي مۇلدە باسقاشا بولعانىن ايتادى. ونىڭ سوزىنشە، ءىس قوزعالاتىن بولعان سوڭ قوماقتى قاراجاتتى شىمكەنت قالالىق ۇقك دەپارتامەنتى باسشىسىنىڭ ەكس-ورىنباسارىنىڭ ءوزى سۇراعان.
"مەنى سارباسوۆتىڭ ءوزى شاقىرعان بولاتىن. ول ۇستىنەن مەنى قاماققا الۋ جايىندا ۇكىم كەلگەنىن ايتتى. مەن "جۇمىس ورنىم كەرەك بولسا، ورنىمدى بوساتا سالايىن" دەگەنمىن. ءبىراق ول كومەكتەسپەيتىنىن ايتتى. كورسەتكەن قىزمەتى قىزمەتپەن وتەلۋ كەرەگىن ايتىپ، ياعني پارا بەرۋدى تۇسپالدادى.
باعانى باستاپقىدا 500 مىڭ دەدى. ال مەن ونىڭ دوللار ەكەنىن تۇسىنبەدىم دە. كەيىن 200-گە ءتۇسىردى. مەن ءوزىمدى بۇل ىستە كىنالى سەزىنبەگەن سوڭ اقشا بەرۋدەن باس تارتقانمىن. مەن نە ءۇشىن اقشا بەرۋىم كەرەك ەدى؟" - دەيدى كۇدىكتى يساحوۆ.
پروكۋرور ايىپتاۋ اكتىسىندە كۇدىكتى پارا بەرۋ ءۇشىن ارنايى سحەما قۇرعانىن ايتقان بولاتىن. ونىڭ سوزىنشە، ولار "اسقارعا" دەگەن كىلتسوزدى قولدانا وتىرىپ، 200 مىڭ دوللاردى قالانىڭ ءبىر دۇكەنىندە قالدىرعان. ول جەردەن قاراجاتتى كەلەسى ادام الىپ، ەكس-شەندىگە تاپسىرۋى كەرەك بولعان.
"ۆيدەونى اشىپ قاراعان كەزدە قارا پاكەتتى كۋرەر الىپ كەلىپ، ساتۋشى قىزعا تاپسىرعان. ودان كەيىن ۆيدەو ۇزىلگەن. كەيىن 1 جارىم ساعاتتەن كەيىن بارىپ ۇلتتىق قاۋىپسىزدىك كوميتەتىنىڭ قىزمەتكەرلەرى كەلىپ، ۆيدەومەن ءتۇسىرىپ اقشانى العان. تاعى ۆيدەو ۇزىلگەن. سودان كەيىن باسقا بولمەگە بارىپ، پاكەتتى اشىپ، اقشانى كورسەتە باستاعان. ونىڭ اراسىندا نە بولعانى بەلگىسىز. مۇمكىن كۋرەر بومبا تاستاپ كەتكەن شىعار. تۇسىنىكسىز. ءبىر قىزىعى اقشانى اراعا 6 كۇن سالىپ ساناعان. 6 كۇن بويى سوندا نە ىستەگەنى دە تۇسىنىكسىز"، - دەيدى كۇدىكتى.
بۇعان دەيىن ەكس-مەملەكەتتىك قىزمەتكەردىڭ ۋاقىتشا قاماۋعا الىنعان-الىنباعانى، تەرگەۋدىڭ قالاي جۇرگىزىلگەنى تۋرالى ەشقانداي اقپارات بولماعان ەدى. ال كۇدىكتى سول ارالىقتا وزىنە قاتتى قىسىم كورسەتىلگەنىن ايتادى.
"35 كۇن بويى تەرگەۋدى ۇلتتىق قاۋىپسىزدىك كوميتەتى جۇرگىزدى. لوگيكالىق تۇرعىدا ويلاڭىزشى، ولار قالاي تەرگەۋ جۇرگىزەدى. ول كەزدە ماعان كوپ قىسىم كورسەتتى. ال ۋاقىتشا تەرگەۋگە كوشىرگەندە كارسەردە ۇستادى. كەيىن كامەراعا اۋىستىردى. جۇبايىمدى قوعامدىق قورعاۋشىم رەتىندە مويىنداماي ساندالتتى. ول كەزدە ماعان 10-15 جىلعا سوتتالاسىڭ دەپ قورقىتۋمەن بولدى. ەگەر ءوزىڭ مويىنداساڭ باسقا بىرەۋدى ۇستاپ بەرسەڭ جازا وتەۋ ۋاقىتىن قىسقارتۋعا كومەك بەرەمىز دەۋمەن بولدى. ءوزىم ءبىر ءوزىم قاماۋدا وتىردىم، ءبىر جاعىنان 6 بالامدى ويلادىم، ونىڭ 5 بەسەۋى كامەلەتكە تولماعان، ال انامنىڭ جاسى 75-تە، ال ءبىر جاعىمنان ۇزدىكسىز قىسىم كورسەتىلىپ جاتتى. مۇنداي جاعدايدا مەن قالاي شەشىم قابىلدارىمدى دا تۇسىنبەدىم"، - دەيدى ول.
بۇعان دەيىن كۇدىكتىنىڭ پارا سۇراعان اۋديو جازباسى الەۋمەتتىك جەلىدە تاراعان بولاتىن. يساحوۆتىڭ زاڭگەرى ول جازبا وڭدەلگەن بولۋى مۇمكىن دەپ توپشىلايدى.
"بارلىق ايىپتاۋ قاعازى قىلمىستىق-پروسەستىك كودەكسi نورمالارىن بۇزا وتىرىپ، قولدان جاسالعان دەپ بىلەمىن. مەنىڭ قورعالۋشىم ءقازىر پارا بەرۋ دەرەگى بويىنشا سوتقا جاۋاپ بەرىپ جاتىر. وعان دەيىن قىزمەتىن اسىرا پايدالاندى دەگەن بولاتىن. الايدا ول ىستەر جابىلدى دا ەندى، بۇل ءىس قوزعالدى. مۇندا ءبىر شيكىلىك بار. ال اۋديو جازبا مۇقسۇت يساحوۆتىڭ رۇقساتىنسىز قولدانىلعان. ونىڭ ۇستىنە ول مونتاجدالعان. وعان قوسا جازبا 2020 جىلى جازىلعان. ءقازىر ەكسپەرتيزادان وتكىزۋ ءۇشىن سوتقا دەيىنگى تەرگەۋ ورگانى مونتاجدالعان جانە مونتاجدالماعان نۇسقانى الۋعا تىرىسىپ جاتىر"، - دەيدى يساحوۆتىڭ زاڭگەرى.
ماقسۇت ءيساحوۆتىڭ ءىسى ءالى جالعاسادى. كەلەسى سوت وتىرىسى ناۋرىزدىڭ سوڭىنا قاراي وتەدى دەپ جوسپارلانعان.
