قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين ءۇندىستان مەن پاكىستان اراسىنداعى شيەلەنىستىڭ ۋشىعۋىنا بايلانىستى اتالعان ەلدەردە جۇرگەن قازاقستاندىق ازاماتتاردى ەۆاكۋاسيالاۋ ماسەلەسىنە قاتىستى پىكىر ءبىلدىردى، دەپ حابارلايدى Dalanews.kz.
بۇگىن وتكەن بريفينگ بارىسىندا Ulysmedia.kz ءتىلشىسى سىرتقى ىستەر مينيسترلىگىنىڭ وسى جاعدايعا بايلانىستى قانداي دا ءبىر ناقتى شارالاردى قولعا الىپ جاتقانىن سۇرادى.
"بۇل ەكى مەملەكەتتە دە ءبىزدىڭ ازاماتتار بار. مەنىڭ بىلۋىمشە، پاكىستانداعىلاردىڭ سانى ءۇندىستانعا قاراعاندا كوبىرەك. بۇل – ەلشىلىكتە رەسمي تىركەۋدە تۇرعان ازاماتتار. قازىرگى تاڭدا ول جاقتا كەڭ اۋقىمدى اسكەري قاقتىعىستار تىركەلگەن جوق، تەك شەكارا ماڭىنداعى ايماقتاردا وقشاۋ شابۋىلدار ورىن العان. سوندىقتان ەۆاكۋاسيا ماسەلەسى ازىرگە كۇن تارتىبىندە تۇرعان جوق"، – دەدى راحمەتۋللين.
ايتا كەتسەك، 7 مامىرعا قاراعان ءتۇنى باقىلاۋعا جاتاتىن سىزىقتا ءۇندىستان مەن پاكىستان اراسىندا اتىس باستالدى. زىمىراندار دا ىسكە قوسىلدى. ودان كەيىن ءۇندىستان "سيندۋر" وپەراسياسىن باستاپ كەتتى. ءۇندىستاننىڭ پەندجاب جانە پاكىستاننىڭ كاشمير ەلدىمەكەندەرىندە بولعان اتىس سالدارىنان 31 ادام قازا تاۋىپ، تاعى بىرنەشە ونداعان ادام جاراقات الدى.
جالپى، ءۇندىستان مەن پاكىستان اراسىنداعى شيەلەنىس 2025 جىلى 22 ساۋىردە كاشميردە بولعان تەراكتىدەن كەيىن ۋشىعا ءتۇستى. ول كەزدە 26 ادام قازا تاپقان ەدى.
