الەۋمەتتىك جەلىدە الماتىداعى قارعالى وزەنىمەن اعىپ بارا جاتقان قۇبىرلار تۇسىرىلگەن ۆيدەولار قىزۋ تالقىعا ءتۇستى، دەپ حابارلايدى Dalanews.kz.
قولدانۋشىلار بۇل كورىنىستى ازىلگە اينالدىرىپ، ءتۇرلى نۇسقا ۇسىندى. ءبىرى ونى «قۇبىرلاردىڭ ماۋسىمدىق كوشى-قونى» نەمەسە «ۋىلدىرىق شاشۋ كەزەڭى» دەسە، ەندى بىرەۋلەرى جۇمىسىن اياقتاعان قۇبىرلار «دەمالىسقا بەت الدى» دەپ قالجىڭداعان.
بۇل جاعدايعا قاتىستى الماتى قالاسى اكىمدىگى رەسمي تۇسىنىكتەمە بەردى. قالالىق ەكولوگيا جانە قورشاعان ورتا باسقارماسىنىڭ تاپسىرىسى بويىنشا قارعالى وزەنىنىڭ جاندوسوۆ كوشەسىنەن رىسقۇلوۆ داڭعىلىنا دەيىنگى بولىگىندە ارنانى قايتا جاڭعىرتۋ جۇمىستارى جۇرگىزىلىپ جاتقانى بەلگىلى بولدى. سۋ بۇرۋ جانە قۇرىلىس-مونتاج شارالارى كەزىندە وزەنگە ديامەترى 600 ميلليمەترلىك گوفرلەنگەن قۇبىرلار ۋاقىتشا ورناتىلعان.
اكىمدىك مالىمەتىنشە، بىرنەشە كۇن بۇرىن وزەندەگى سۋ دەڭگەيى كۇرت كوتەرىلىپ، قاتتى اعىس ۋاقىتشا بوگەتتەردى بۇزىپ وتكەن. سونىڭ سالدارىنان ورناتىلعان قۇبىرلاردى سۋ الىپ كەتكەن.
«قازىرگى تاڭدا جاعداي قالىپقا كەلدى جانە تۇراقتى باقىلاۋدا. اعىنمەن كەتكەن گوفرلەنگەن قۇبىرلار مەردىگەر ۇيىمنىڭ كۇشىمەن وزەن ارناسىنان تولىق شىعارىلدى»، – دەپ حابارلادى قالا اكىمدىگىندە.
