تۇركىستان وبلىسى اۋماعىندا زاڭسىز جەر قويناۋىن پايدالانۋ مەن قورشاعان ورتاعا اسا ءىرى كولەمدە زالال كەلتىرىپ جاتقان قىلمىستىق توپتاردىڭ ارەكەتىن اشكەرەلەۋ ماسەلەسى وبلىس اكىمى ءومىرزاق شوكەيەۆتىڭ توراعالىعىمەن وتكەن ماجىلىستە تالقىلاندى. وبلىس اۋماعىندا كەڭ تارالعان پايدالى قازبالاردى وندىرۋگە جالپى 110 كەلىسىمشارت جانە 38 ليسەنزيا بەرىلگەن. بۇگىننەن باستاپ ليسەنزيا بەرۋگە موراتوريي جاريالاندى.
– زاڭسىز جەر قويناۋىن پايدالانۋ كوبەيىپ كەتتى. اسىرەسە وزەندەردىڭ بويىنداعى تاس، قۇم قازعانداردىڭ جولىن كەسىپ، قىزمەتىنە توسقاۋىل قويۋ كەرەك. بۇل ماسەلەنى اۋدانداردا وتكەن كەزدەسۋ كەزىندە اۋىل اقساقالدارى كوتەرىپ، الاڭداۋشىلىق بىلدىرگەن بولاتىن. تابيعاتقا قيانات جاساۋعا بولمايدى. وزەن ارناسىن تابا الماي قالدىق. ءتارتىپ ورناتپاي، تىنبايمىن، – دەدى وبلىس اكىمى ءومىرزاق شوكەيەۆ.
قۇم، تاس كارەرىنىڭ كەسىرىنەن وزەندەر سارقىلىپ، اۋىلدار سۋسىز قالىپ، كوپىرلەر مەن جولدار جارامسىز كۇيگە تۇسۋدە. جەر قىرتىسى ءبۇلىنىپ، تاۋداعى بۇلاقتار تارتىلىپ جاتىر. كەڭ تارالعان پايدالى قازبالاردان شاعالتاس، كۇم، توپىراق، گيپس، اس تۇزى، اك-تاس سەكىلدى پايدالى قازبالارى وندىرىلەدى. قۇرىلىس نىساندارىنىڭ شوعىرلانعان اۋماعى مەن پايدالى قازبالار قورىلارىنىڭ ورنالاسقان ورنىن ەسكەرە وتىرىپ، رۇقسات قۇجاتتارى نەگىزىنەن كەنتاۋ قالاسى جانە سايرام، ورداباسى اۋداندارى اۋماقتارىنا راسىمدەلگەن. زاڭسىز قىزمەتكە توسقاۋىل قويۋ جولدارى تالقىلانعان جيىندا وبلىس اكىمى قۇزىرلى ورگان باسشىلارىنا ناقتى تاپسىرمالار جۇكتەدى.
قۇزىرلى ورگاندار تاس قازاتىن جەرلەردى جاۋىپ، رۇقسات قۇجاتتاردىڭ كۇشىن جويۋ ءۇشىن كۇش سالادى. وسى ۋاقىتقا دەيىن ەكولوگتار تەكسەرىپ، زاڭ بۇزۋشىلىققا بارعاندارعا ايىپپۇل سالۋمەن شەكتەلەدى. وتىرىستا وبلىستىق مامانداندىرىلعان تابيعات قورعاۋ پروكۋرورى سەرىك ابدييەۆ جەر قويناۋىن پايدالانۋدى جويۋدىڭ ءبىر جولى رەتىندە قىلمىسى قايتالانعانداردىڭ مۇلكىن زاڭدى تۇردە تاركىلەۋدى ۇسىندى. بيىلدىڭ وزىندە 8 قىلمىستىق قۇرامى بار جەر قويناۋىن زاڭسىز پايدالانۋ فاكتىلەرى انىقتالىپ، 1،827 ملرد.تگ. كولەمدەگى قورشاعان ورتاعا كەلتىرىلگەن زالالدى سوتپەن ماجبۇرلەپ وندىرىلۋدە.
