بۇۇ جەر شارىنىڭ تۇرعىندارى ءوزىن قانشالىقتى باقىتتى سەزىنەتىنى تۋرالى باياندايتىن «باقىت يندەكسىن» جاريالادى. ونىڭ اۆتورلارى زەرتتەۋگە قاتىسقان 156 ەلدىڭ ىشىندە ەڭ باقىتتى جاندار دانيادا تۇرادى دەپ تاپقان. ودان كەيىنگى ورىنداردا شۆەيسارلار، يسلاندىقتار، نورۆەگتەر، فيندەر جانە باسقالار.

پوستكەڭەستىك ەلدەردەگى ەڭ باقىتتى ادامدار بىلتىرعىداي وزبەكستاندا تۇراتىن بوپ شىقتى: بۇل ەل رەيتينگتە 49-ورىنعا تابان تىرەگەن. باقىت يندەكسىندەگى كەلەسى ورىندى قازاقستان يەلەندى (54)، ودان ءارى تىزىمدە مولدوۆا (55) جانە رەسەي (56). ولاردان ءسال تومەنىرەك، 61-ورىنعا بەلارۋس جايعاسقان، ونىڭ ءىزىن وكشەلەي تۇركىمەنستان (65 ورىن) تۇر. ءازىربايجان رەيتينگتە 81-ورىندى يەلەنسە، قىرعىزستان 85، ال تاجىكستان ءجۇزىنشى ورىننان تابىلعان.

رەيتينگ اۆتورلارى ەلدىڭ دامۋ دەڭگەيى، دەنساۋلىق ساقتاۋ مەن الەۋمەتتىك قولداۋ كورسەتكىشتەرى سەكىلدى وبەكتيۆتى فاكتورلارمەن قاتار، تۇرعىنداردىڭ جەكە باسىنىڭ پىكىرلەرى مەن كوزقاراسىن ەسكەرگەن. ەل تۇرعىندارى ءومىرىنىڭ ءمانى، قانداي دا ءبىر شەشىم قابىلداۋعا قاتىسۋ مۇمكىندىگى، ءوزى قالاعانداي ءومىر ءسۇرۋ ەركىندىگى جانە ەلدەگى بيلىكتىڭ جۇمىسى تۋرالى سۇراقتارعا جاۋاپ بەرگەن.