تۇركىستان وبلىسى پروكۋراتۋراسىنىڭ ۇيلەستىرۋىمەن، قارجىلىق مونيتورينگ اگەنتتىگىنىڭ جانە ۇلتتىق قاۋىپسىزدىك كوميتەتىنىڭ وبلىستىق دەپارتامەنتتەرى بىرلەسىپ، وزبەكستان قۇقىق قورعاۋ ورگاندارىنىڭ قولداۋىمەن جانارماي ونىمدەرىن جاسىرىن توننەل ارقىلى شەكارادان وتكىزۋمەن اينالىسقان حالىقارالىق قىلمىستىق توپتىڭ ارەكەتىن اشكەرەلەدى، دەپ حابارلايدى Dalanews.kz.
تەرگەۋ بارىسىندا قازاقستان مەن وزبەكستان اراسىنداعى شەكاراعا جاقىن اۋماقتا توپ مۇشەلەرى 450 مەترلىك جەراستى توننەلىن قازعانى انىقتالدى.
قىلمىستىق سحەما 2 اي بويى جۇمىس ىستەگەن. وسى ۋاقىت ىشىندە شەتەلدەن قارجىلاندىرىلىپ وتىرعان جانار-جاعارماي ماتەريالدارىن تاسىمالداۋعا ارنالعان لوگيستيكالىق باعىتتار مەن جاسىرىن شىعارۋ ارناسى قۇرىلعان.
وپەراسيا بارىسىندا وزبەكستان تاراپى دا ءوز اۋماعىندا ءدال وسىنداي شارالار جۇرگىزگەن.
ناتيجەسىندە قىلمىستىق ارەكەتكە قاتىسى بار بارلىق تۇلعالار انىقتالدى. قازاقستان رەسپۋبليكاسىنىڭ 5 ازاماتى كۇدىكتى رەتىندە تانىلدى.
قازىرگى ۋاقىتتا تەرگەۋ اياقتالىپ، قىلمىستىق ءىس سوتقا جولداندى.
