بۇل جايىندا رەسەيدىڭ سىرتقى ىستەر ءمينيسترى سەرگەي لاۆروۆ ارنايى مالىمدەمە جاساپ، وزبەكستاننىڭ بۇل شەشىمىنە ءدان ريزا ەكەنىن ايتتى.
ونىڭ اتاپ وتكەنىندەي ەۋرازيالىق وداقتىڭ ىقپالىن ارتتىرىپ، قۇلاشىن كەڭەيتە ءتۇسۋ ۇيىمنىڭ باستى مۇراتىنىڭ ءبىرى.
“وداقتاس ەلدەر سونىڭ نەگىزىندە الىس-بارىس، بارىس-كەلىستى جاقسارتىپ، ەكونوميكالىق ءال-قۋاتىن كوتەرۋگە مۇمكىندىك الادى”، – دەيدى لاۆروۆ.
…
وزبەكستاننىڭ ەۋرازيالىق وداقتىڭ قۇرامىنا باقىلاۋشى رەتىندە قوسىلۋى كرەمل يدەولوگتارىنىڭ كوپتەن بەرى كوكسەپ جۇرگەن ارمانى. ماسكەۋ بۇل ماسەلەنى وزبەكستاننىڭ ءوز ىشىندەگى رەسەيشىل ساياساتكەرلەردىڭ اۋزىنا سالىپ، ميرزيايەۆ پرەزيدەنت بولعالى بەلسەندى ۇگىتتەۋمەن كەلدى.
بۇدان بۇرىن وزبەك ۇكىمەتى “ەۋرازيالىق وداقپەن ارىپتەسۋدىڭ جولدارىن ىزدەپ جاتقانىن” مالىمدەگەن.
سونىڭ الدىندا Dalanews.kz-كە سۇحبات بەرگەن وزبەك شولۋشىسى باحتيار ەرعاشيەۆ كرەملدىڭ وزبەكستاندى ۇيىمعا قوسۋعا ىنتىق ەكەنىن، كارىموۆ بيلىگى كەزىندە تاشكەنتتىڭ وسى بلوكقا ۇمتىلماعانىن ايتقان.
بيلىككە شاۆكات ميرزيايەۆ كەلگەن تۇستان وداققا قوسىلۋ تۋرالى تالقىلاۋلار قايتا قىزعان.
"باقىلاۋشى ستاتۋسى ءبىزدىڭ ەلگە ءتيىمدى. ءوز باسىم بولاشاقتا وزبەكستاننىڭ وسى وداققا ءبىرجولاتا ءوتىپ كەتپەي، ەركىن ساۋدا ايماعىمەن عانا شەكتەلۋىن قولدايمىن. سونىڭ ءوزى جەتكىلىكتى.
البەتتە وزبەكتەردىڭ ءوز اراسىندا وسى وداققا قوسىلۋدى قۇپتايتىندار كوپ.
ولاردىڭ ءۋاجى: "ءازىر رەسەيدە جان باعىپ جۇرگەن 2،5 ملن-عا تارتا وزبەك ميگرانتى (بۇعان قازاقستانداعى وزبەكتىڭ 500 مىڭعا جۋىق جۇمىس كۇشىن قوسىڭىز) جارىتىپ جالاقى الىپ، جۇمىس جاعدايىن جاقسارتۋعا مۇمكىندىك الادى". وزبەكستاننىڭ توقىما-تىگىن ءوندىرىسى، بىلعارى دايىندايتىن، اياق كيىم تىگەتىن وندىرۋشىلەر تاۋارىن وداق نارىعىنا شىعارۋعا قۇلشىنىپ وتىر. ءبىراق تاياقتىڭ ەكى ۇشى بار ەمەس پە؟
ەۋرازيالىق وداققا وتەر بولسا، وزبەكتىڭ اۆتوكولىك ءوندىرىس جاپا شەگەدى.
جىلىنا 200 مىڭ كولىك قۇراستىراتىن وزبەكستاننىڭ الەۋەتىن ءدال وسى ارالىقتا 2 ملن كولىكتى ساۋداعا شىعاراتىن رەسەيمەن سالىستىرۋعا بولمايدى. مۇندايدا ءادىل باسەكە تۋرالى ايتۋدىڭ ءوزى ورىنسىز.
وزبەكستان وسى وداققا وتسە، كۇللى ەكونوميكانىڭ كۇرەتامىرى سانالاتىن كولىك ءوندىرىسىن كۇلگە كومەدى"، – دەگەن ەدى ساياساتتانۋشى.
ەۋرازيالىق ەكونوميكالىق وداقتى (ەاەو) رەسەي 2015 جىلى بەلارۋس جانە قازاقستانمەن بىرگە قۇردى. كەيىن ۇيىمعا ارمەنيا مەن قىرعىزستان كىردى.
