14 ناۋرىز كۇنى اقتاۋ قالاسىندا تەڭىز جاعالاۋىندا روزا رىمبايەۆانىڭ كونسەرتى بولدى. ءانشى اۋا رايىنىڭ قولايسىزدىعىنا قاراماستان شارانى توقتاتپاي، سوڭىنا دەيىن وتكىزگەن، دەپ حابارلايدى Dalanews.kz.
روزا رىمبايەۆا اقتاۋدا ناۋرىز مەيرامى مەن امال مەرەكەسىنىڭ قۇرمەتىنە اشىق اسپان استىندا كونسەرت بەردى. الايدا سول كۇنى 112 قىزمەتى وبلىس بويىنشا جىلدامدىعى سەكۋندىنا 20 مەترگە دەيىن جەتەتىن جەل سوعاتىنى جونىندە ەسكەرتۋ جولداعان.
ال ءانشى اۋا رايىنىڭ قولايسىزدىعىنا قاراماستان، كونسەرتىنەن باس تارتپاي، ازداعان كورەرمەن الدىندا ونەر كورسەتتى. كونسەرتكە بار-جوعى 50-گە جۋىق قالا تۇرعىنى جينالعان.
"كونسەرتتى وتكىزبەيىك دەگەنبىز، ءبىراق روزا رىمبايەۆا ۇزىلدى-كەسىلدى باس تارتتى. اقتاۋلىقتار قاشاننان مىقتى ادامدار. ولار بۇل قالانى ىستىققا، قاقاعان ايازعا، قاتتى جەلگە قاراماستان تۇرعىزعان. سوندىقتان بۇل كونسەرت اقتاۋلىقتارعا دەگەن قۇرمەت رەتىندە وتكىزىلدى"، – دەدى ۇيىمداستىرۋشىلار.
بۇعان دەيىن پاۆلودار قالاسىنىڭ اكىمدىگى روزا رىمبايەۆا مەن قايرات نۇرتاستىڭ ناۋرىز مەرەكەسىنە وراي قالا تۇرعىندارىنىڭ الدىندا ونەر كورسەتكەنى ءۇشىن قانشا گونورار الاتىنىن ايتقان ەدى. قوس جۇلدىزدىڭ كونسەرتىنە بيۋدجەتتەن 10 ميلليون تەڭگە بولىنگەن.
