قازاقستان قارجىگەرلەرى قاۋىمداستىعى (ققق) ساراپشىلارىنىڭ نارىقتارعا شولۋى جاريالاندى. وعان سايكەس، ينۆەستورلار وسى اپتادا جاريالاناتىن قازترانسويل، Kcell، KEGOC كومپانيالارىنىڭ توقساندىق قارجىلىق ەسەپتەرىن تاعاتسىزدانا كۇتىپ وتىر. ال وتكەن اپتادا قور نارىعىندا حالىق بانكى مەن Air Astana اكسيالارىنىڭ باعاسى جاقسى ءوستى، دەپ حابارلايدى Dalanews.kz.
ۆاليۋتا نارىعى
KASE-دە جۇما كۇنى ۆاليۋتا ساۋداسى قىزىپ، ساۋدا-ساتتىق كولەمى 178،4 ملن دوللارعا (+24،9 ملن) دەيىن ارتتى، ال USD/KZT جۇبى بويىنشا ورتاشا باعام 491،74 تەڭگە (-0،36 تەڭگە) دەڭگەيىندە بەكىتىلدى. بيۋدجەت قاراجاتىن يگەرۋدە شارىقتاۋ شەكتەن وتۋگە بايلانىستى شەتەل ۆاليۋتاسىنا دەگەن ارتىق سۇرانىستى قاناعاتتاندىرۋ، ۇلتتىق قوردان الىنىپ، ساتىلعان شەتەل ۆاليۋتاسى كولەمىنىڭ ارتۋى (قاراشا ايىندا - 1،5 ملرد دوللار)، توقساندىق فيسكالدىق كەزەڭنىڭ جاقىنداۋى سياقتى ىشكى فاكتورلار ۇلتتىق ۆاليۋتاعا قولداۋ كورسەتۋى مۇمكىن. سونىمەن قاتار، سىرتقى فاكتورلار تەرىس سيپاتقا يە: دوللار يندەكسىنىڭ وسۋىنە بايلانىستى مۇناي باعاسى تومەندەدى.
بۇگىنگى، 11 قاراشادا قور بيرجاسىندا (11:10 ALA) كۇندىزگى ساۋدا-ساتتىق قورىتىندىسى بويىنشا 1 اقش دوللارى 491،71 تەڭگە دەڭگەيىندە بەلگىلەندى.
قور نارىعى
جۇما كۇنگى KASE يندەكسى 5 325،6 پۋنكت (+0،31%) بەلگىسىندە جابىلىپ، قالىپتى ءوسىمدى كورسەتتى. اتالعان ءوسىمنىڭ درايۆەرى رەتىندە قوسىمشا ديۆيدەنتتەر تولەپ، اكسيالارىن كەرى ساتىپ الادى دەپ كۇتىلگەن حالىق بانكى (+1،3%) جانە ەسەپتەرى جاريالانعاننان كەيىنگى اينالىمداعى اكسيالاردى كەرى ساتىپ الۋدى جالعاستىرعان Air Astana (+1،3%) اكسيالارى ءرول اتقاردى.
بۇل اپتادا ينۆەستورداردىڭ باستى نازارى قازترانسويل (13 قاراشا)، Kcell (14 قاراشا)، KEGOC (15 قاراشا)، ۆوسا-Air Astana جانە قازاتومونەركاسىپتىڭ (15 قاراشا) جاريالايتىن توقساندىق قارجىلىق ەسەپتەرىنە اۋماق، دەلىنگەن ققق شولۋىندا.
مۇناي
جۇما كۇنى Brent ماركالى مۇنايدىڭ ءبىر باررەلىنىڭ باعاسى مەكسيكا شىعاناعىنداعى مۇناي وندىرىسىنە رافاەل داۋىلىنىڭ ازداپ قانا كەدەرگى كەلتىرۋى جانە قحر-دىڭ ەل ەكونوميكاسىن ىنتالاندىرۋى (10 ترلن يۋان نەمەسە1،4 ترلن دوللار جەرگىلىكتى ءوزىن-وزى باسقارۋ ورگاندارىنىڭ بورىشتىق جۇكتەمەسىن تومەندەتۋ باعدارلاماسىنا باعىتتالادى) اياسىندا 73،9 دوللارعا (-2،3%) دەيىن تومەندەدى.
بۇل اپتادا باستى نازاردا وپەك (12 قاراشا) جانە حەا -نىڭ (14 قاراشا) اي سايىن جاريالايتىن ەسەپتەرى، سونداي-اق EIA جاريالايتىن (13 قاراشا) اقش-تاعى شيكىزات قورى مەن ءوندىرىس كولەمى بولماق.
بۇعان دەيىن قازاقستان قارجىگەرلەرى قاۋىمداستىعىنىڭ (ققق) اناليتيكالىق ورتالىعى ازىرلەگەن تاعى ءبىر زەرتتەۋىمەن بولىسكەن بولاتىنبىز. وعان 2024 جىلعى قاراشاداعى كەيبىر ينديكاتورلار بويىنشا قارجى نارىعىنىڭ كاسىبي قاتىسۋشىلارى اراسىندا جۇرگىزىلگەن كەزەكتى ساۋالناما ناتيجەسى نەگىز. ونداعى بولجامعا سايكەس، كەلەسى جىلدىڭ اياعىنا قاراي تەڭگەگە شاققاندا ءبىر اقش دوللارىنىڭ قۇنى 507 تەڭگە بولۋى مۇمكىن.
