ءازىر وتىرار اۋدانىندا 7 ەلدى مەكەننىڭ تۇرعىندارى اۋىزسۋدى تاسىپ ىشەدى. «ساتىپ ىشكەن سۋدىڭ بەرەكەسى بولمايدى»، – دەيدى اۋىل تۇرعىندارى. ايىنا ەكى رەت 2 مىڭ تەڭگەدەن تولەپ، ەسىك الدىنداعى قۇدىقتى تولتىرىپ الادى. تۇرىپ قالعان تىرشىلىك ءنارىن تۇتىنۋدىڭ ءوزى قيىن.
– ارينە، تازا سۋ كەلسە، ءجۇدا، جاقسى بولار ەدى، دەنساۋلىققا پايدالى تاسىپ ىشكەننەن. جەردىڭ استىنان شىققان سۋعا نە جەتسىن! – دەيدى اۋىل تۇرعىندارى.
قازىرگى كۇنى وتىرار اۋدانىندا 38 ەلدى مەكەن بار. ونىڭ 31 اۋىزسۋمەن قامتىلعان.
اۋىزدارى تازا اۋىزسۋعا جەتپەي وتىرعان 7 ەلدى مەكەننىڭ ەكەۋىنە بيىل تارشىلىك ءنارى تارتىلماق. ولار قوستەرەك پەن ارىساقتام اۋىلدارى.
ەرلان ايتاحانوۆ، وتىرار اۋدانىنىڭ اكىمى:
– ەكى ەلدى مەكەننەن 1500 حالقى بار اۋىل اۋىزسۋمەن قامتىلادى دەپ جوسپارلاپ وتىر. بۇل جوبا وتپەلى، بيىل باستالىپ، كەلەسى جىلى اياقتالادى. قالعان 5 ەلدى مەكەندى ايتاتىن بولساق، 3 ەلدى مەكەننىڭ جوبالىق-سمەتالىق قۇجاتتارى بۇگىنگى تاڭدا دايىندالىپ، ونى وبلىستىق، رەسپۋبليكالىق بيۋدجەتكە ۇسىندىق. جالپى ءبىزدىڭ جوسپارىمىز – 2020 جىلعا دەيىن اۋدانداعى اۋىزسۋ ماسەلەسىن تولىق شەشۋ.
جالپى الداعى جىلى تۇركىستان وبلىسىندا 35 ەلدى مەكەندى اۋىزسۋمەن قامتۋ جوسپارلانىپ وتىر. وعان بيۋدجەتتەن 9،6 ملرد تەڭگە ءبولىنىپ، 76 نىساننىڭ قۇرىلىسى ىسكە اسىرىلۋدا. ناتيجەسىندە تىرشىلىك نارىنەن تارىققان 20 مىڭ ادامنىڭ اۋىزى تازا اۋىزسۋعا جەتەدى. ال 2020 جىلعا قاراي قالا تۇرعىندارىنىڭ 97 پايىزى، اۋىلدىق ەلدى مەكەندەردىڭ 83 پايىزى ورتالىقتاندىرىلعان اۋىزسۋمەن قامتىلاتىن بولادى.
