شاھار تاعى دا ءبىر سپورتتىق نىسان ەل يگىلىنە پايدالانۋعا بەرىلدى. ءبىزدىڭ ەلىمىز ءۇشىن ۇستەل تەننيسى – ەڭ تانىمال جانە بۇقارالىق سپورت تۇرلەرىنىڭ ءبىرى. تەك شقو-دا 450-دەن استام تەننيس سەكسيالارى جۇمىس ىستەيدى، وندا 11 مىڭ ادام اينالىسادى.
ەلىمىز بويىنشا ەڭ ءىرى مامانداندىرىلعان ۇستەل تەننيسى ورتالىعىندا 58 ۇستەل مەن 300-گە جۋىق كورەرمەن ورنى بار. سونداي-اق، ەڭ جوعارى دەڭگەيدەگى حالىقارالىق جارىستاردى قابىلداي الادى.
بىرەگەي سپورت نىسانىنىڭ اشىلۋ سالتاناتىنا ءوڭىر باسشىسى دانيال احمەتوۆ، وليمپيادا چەمپيونى ولگا رىپاكوۆا، ستول تەننيسى فەدەراسياسىنىڭ پرەزيدەنتى دانيار ابۋلعازين جانە سپورت جانكۇيەرلەرى قاتىستى.
وبلىستا بۇقارالىق سپورتتى دامىتۋعا ەرەكشە كوڭىل ءبولىنىپ كەلەتىنى جايلى ءوڭىر باسشىسى ەرەكشە اتاپ ءوتىپ، بۇل سپورتتىق نىساننان تالاي جەڭىمپازداردىڭ شىعاتىنىنا سەنىم ءبىلدىردى.
– بۇگىن ءبىز ءۇشىن ەرەكشە كۇن دوستارىم. تەننيس ورتالىعى حالىقارالىق ستاندارتتارعا ساي. الەمدىك دەڭگەيدەگى باسەكەلەردى وتكىزۋگە تولىق مۇمكىندىگىمىز بار. بولاشاقتا ازيا، الەم چەمپيوناتتارىن وتكىزەتىن كۇن الىس ەمەس، – دەدى شقو اكىمى دانيال احمەتوۆ.
بۇل جەردە تەك بالالار مەن ەرەسەكتەر عانا ەمەس، سونداي-اق سپورتتىڭ وسى تۇرىمەن شۇعىلداناتىن، بارلىق قاجەتتى جاعدايلار جاسالعان ەرەكشە قاجەتتىلىكتەرى بار ادامدار دا اينالىسا الاتىنى وتە ماڭىزدى.
وسكەمەن قالاسىنىڭ تۇرعىندارى كاسىبي جانە اۋەسقوي سپورتپەن اينالىسۋعا بارلىق مۇمكىندىكتەرى بار. ورتالىقتا ۇستەل تەننيسىنەن ارنايى اشىلعان بالالار مەن جاسوسپىرىمدەر سپورت مەكتەبى جۇمىس ىستەيدى، ول ءۇشىن كاسىبي جاتتىقتىرۋشىلار ەڭبەك ەتەدى.
سونداي-اق عيماراتتا سپورتشىلاردى وڭالتۋ جانە فيزيوتەراپياعا ارنالعان ەڭ زاماناۋي جابدىقتارمەن جابدىقتالعان مەديسينالىق ديسپانسەر ورنالاسقان.
بۇگىندە مەملەكەت باسشىسى قاسىم-جومارت كەمەل ۇلى توقايەۆ بۇقارالىق سپورتتى دامىتۋعا ەرەكشە كوڭىل بولۋدە. وسكەمەن قالاسىندا اشىلعان ستول تەننيسى ورتالىعى حالىقتىڭ سپورتقا دەگەن قىزىعۋشىلىعىن ارتتىرىپ، بولاشاق چەمپيونداردى تاربيەلەيتىن نىسان بولارى انىق.
