وسكەمەن قالاسىندا جاڭا جىلۋ ەلەكتر ورتالىعىن سالۋ جوسپارلانعان. بۇل جايىندا وڭىرلىك كوممۋنيكاسيالار قىزمەتىندە وتكەن بريفينگتە شىعىس قازاقستان وبلىسى ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى نۇرلان رامازانوۆ ايتىپ بەردى، دەپ حابارلايدى Dalanews.kz Altainews.kz-كە سىلتەمە جاساپ.
جاڭا جىلۋ ەلەكتر ورتالىعى پرەزيدەنت قاسىم-جومارت توقايەۆتىڭ تاپسىرماسىنا سايكەس سالىنباق. جوبا جىلۋ قۋاتىنىڭ تاپشىلىعىن جويۋعا جانە قالانى دامىتۋ ءۇشىن قاجەتتى رەزەرۆتى قۇرۋعا مۇمكىندىك بەرەدى. بۇگىندە وڭىردە جىلۋ قۋاتىنا دەگەن قاجەتتىلىك 1232 گكال/ساع قۇرايدى.
سونداي-اق وسكەمەن قالاسىندا جىلۋ ەنەرگياسىنىڭ تاپشىلىعىن تومەندەتۋ ماقساتىندا 2023 جىلعى جەلتوقساندا «وسكەمەن جىلۋ جەلىلەرى» اق №2 قازاندىقتى كەڭەيتۋ بويىنشا جوبالاۋ-سمەتالىق قۇجاتتامانى ازىرلەۋ باستالدى، بۇل جوبا جىلۋ كوزىن ساعاتىنا 100 گكال-عا ۇلعايتۋعا باعىتتالعان.
«وسكەمەن جەو» ج ش س ەنەرگەتيكا مينيسترلىگىمەن جىلۋ قۋاتى 130 گكال/ساع بولاتىن 16-شى قازاندىق اگرەگاتىن سالۋعا ينۆەستيسيالىق كەلىسىمگە قول قويدى، ال «سوگرا جەو» جشس-دە قۋاتى 60 گكال/ساع بولاتىن ءتورتىنشى قازاندىق اگرەگاتىن سالۋعا كەلىسىم جاساسۋ ماسەلەسى پىسىقتالۋدا.
