«جالپىۇلتتىق سوسيال-دەموكراتيالىق پارتياسى 19 ادامنان تۇراتىن پارتيالىق ءتىزىمدى ۇسىندى. بۇل تىزىمدە 6 كانديدات بار: ايەلدەر، جاستار جانە مۇگەدەكتىگى بار ادامدار. ولار كانديداتتاردىڭ جالپى سانىنىڭ 31،6 پايىزىن قۇرايدى. بەلگىلەنگەن كۆوتا ساقتالعان. ورتالىق سايلاۋ كوميسسياسى وكىلەتتى مەملەكەتتىك ورگاندارمەن بىرلەسىپ، ءماجىلىس دەپۋتاتى بولىپ سايلانۋ ءۇشىن پارتيالىق تىزىمگە ەنگىزىلگەن ادامداردىڭ كونستيتۋسيا مەن «سايلاۋ تۋرالى» كونستيتۋسيالىق زاڭنىڭ تالاپتارىنا سايكەستىگىنە تەكسەرۋ جۇرگىزدى. پارتيالىق تىزىمگە ەنگىزىلگەن بارلىق ادام كونستيتۋسيانىڭ جانە «سايلاۋ تۋرالى» كونستيتۋسيالىق زاڭنىڭ تالاپتارىنا سايكەس كەلەدى»، - دەدى وسك مۇشەسى اناستاسيا ششەگورسوۆا.
ونىڭ اتاپ وتۋىنشە، جسدپ پارلامەنت ءماجىلىسى دەپۋتاتتارىنىڭ الدىڭعى سايلاۋىنا قاتىسقان جوق.
«سوندىقتان «سايلاۋ تۋرالى» زاڭنىڭ 88-بابىنا پارتيا ءتىزىمىن تىركەۋ ءۇشىن وسك شوتىنا سايلاۋ جارناسىن ەنگىزۋى ءتيىس. جارنا سوماسى پارتيالىق تىزىمگە ەنگىزىلگەن ءاربىر ادام ءۇشىن ەڭ تومەنگى جالاقىنىڭ 15 ەسەلەنگەن مولشەرىن قۇرايدى. جسدپ سايلاۋ جارناسىن تولىق كولەمدە تولەدى»، - دەدى ول.
وسىدان كەيىن ورتالىق سايلاۋ كوميسسياسىنىڭ مۇشەلەرى جالپىۇلتتىق سوسيال-دەموكراتيالىق پارتياسى قوعامدىق بىرلەستىگىنەن پارلامەنت ءماجىلىسى دەپۋتاتتىعىنا كانديداتتاردىڭ ق ر كونستيتۋسياسىندا جانە «سايلاۋ تۋرالى» كونستيتۋسيالىق زاڭدا ولارعا قويىلاتىن تالاپتارعا سايكەستىگىن انىقتاۋ تۋرالى، جسدپ-نىڭ پارتيالىق ءتىزىمىن تىركەۋ تۋرالى حاتتامالارعا قول قويدى.
