قىرعىزستان پرەزيدەنتى سادىر جاپاروۆ «بالا ىرىسى» اتتى جاڭا جارلىققا قول قويدى. قۇجاتقا سايكەس، 2026 جىلدىڭ شىلدەسىنەن باستاپ ءۇش جاسقا دەيىنگى ءاربىر بالاعا وتباسىنىڭ تابىسىنا قاراماستان اي سايىن 1200 سوم تولەنەدى.

بۇل باستاما ورتالىق ازيا ەلدەرىندەگى بالالارعا ارنالعان الەۋمەتتىك تولەمدەر جۇيەسىن قايتا تالقىلاۋعا تۇرتكى بولدى. QZ Economy ساراپشىلارى وڭىردەگى جاردەماقىلار كولەمىن سالىستىرىپ كوردى، دەپ حابارلايدى Dalanews.kz.

قىرعىزستاندا قانداي تولەمدەر بار؟

قىرعىزستاندا ءقازىر بىرنەشە الەۋمەتتىك تولەم ءتۇرى قاراستىرىلعان. سونىڭ ءبىرى – جۇكتىلىك پەن بوسانۋعا بايلانىستى جاردەماقى.

قالىپتى بوسانۋ كەزىندە ايەلدەرگە 126 كۇنگە (بوسانۋعا دەيىن 70 كۇن جانە بوسانعاننان كەيىن 56 كۇن) تولەم جاسالادى. ەگەر بوسانۋ اسقىنۋمەن وتسە نەمەسە ەگىز، ۇشەم سياقتى بىرنەشە بالا دۇنيەگە كەلسە، تولەم 140 كۇنگە بەرىلەدى. ال تاۋلى نەمەسە قولجەتىمدىلىگى قيىن ايماقتاردا جۇمىس ىستەيتىن ايەلدەرگە جانە كوپۇرىقتى جۇكتىلىك كەزىندە 180 كۇنگە دەيىن تولەنەدى.

جاردەماقىنىڭ مولشەرى دە ەرەكشە ەسەپتەلەدى: العاشقى 10 جۇمىس كۇنىنە جالاقىنىڭ 100 پايىزى تولەنەدى، ودان كەيىن اي سايىن 2 مىڭ سوم بەرىلەدى.

بۇدان بولەك، بالا تۋعان كەزدە «بالاگا ءسۇيۇنچۇ» اتتى ءبىر رەتتىك تولەم بار. ونىڭ كولەمى – ءار بالاعا 4 مىڭ سوم.

ەندى وسى جۇيەگە «بالا ىرىسى» باعدارلاماسى قوسىلادى. ول بويىنشا ءۇش جاسقا دەيىنگى ءار بالاعا اي سايىن 1200 سوم تولەنەدى.

ۆاليۋتا باعامىنا شاققاندا:

• 1200 سوم – شامامەن 7 مىڭ تەڭگە؛

• 2000 سوم – شامامەن 11،3 مىڭ تەڭگە؛

• 4000 سوم ءبىر رەتتىك تولەم – شامامەن 22،7 مىڭ تەڭگە.

ەسەپ بويىنشا، ورتاشا جاعدايدا ءبىر وتباسى ءۇش جىل ىشىندە «بالا ىرىسى» ارقىلى شامامەن 250 مىڭ تەڭگە الادى. وعان قوسا جۇكتىلىك پەن بوسانۋعا بايلانىستى تولەم شامامەن 50 مىڭ تەڭگە جانە 22،7 مىڭ تەڭگە كولەمىندەگى ءبىر رەتتىك جاردەماقى قوسىلادى.

وسىلايشا، جالپى تولەم كولەمى شامامەن 320–325 مىڭ تەڭگە.

وزبەكستانداعى تولەمدەر

وزبەكستاندا ءقازىر ءبىرىنشى بالا تۋعان كەزدە مەملەكەتتىك ءبىر رەتتىك تولەم بەرىلەدى. ونىڭ كولەمى ەڭ تومەنگى جالاقىنىڭ 70،3 پايىزىنا تەڭ.

بۇل شامامەن 893،5 مىڭ سۋم نەمەسە 36،5 مىڭ تەڭگە.

ەكىنشى جانە ودان كەيىنگى بالالارعا مۇنداي تولەم تەك رەسمي تۇردە از قامتىلعان دەپ تانىلعان وتباسىلارعا عانا بەرىلەدى.

جالپى العاندا، نەگىزگى مەملەكەتتىك تولەم كولەمى – 36 500 تەڭگە.

تاجىكستانداعى تولەمدەر

تاجىكستاندا جاردەماقى كولەمى ايتارلىقتاي تومەن. سوڭعى دەرەكتەرگە سايكەس:

• ءبىرىنشى بالاعا شامامەن 20 دوللار؛

• ەكىنشى بالاعا 13 دوللار؛

• ءۇشىنشى جانە ودان كەيىنگى بالالارعا 7 دوللار تولەنەدى.

بۇل تەڭگەگە شاققاندا شامامەن 10 مىڭ، 6،5 مىڭ جانە 3،5 مىڭ تەڭگە شاماسىندا.

قازاقستانداعى جۇيە قالاي جۇمىس ىستەيدى؟

قازاقستاندا بالا تۋۋى مەن ونى كۇتۋگە بايلانىستى جاردەماقىلار جۇيەسى ءبىرشاما قالىپتاسقان.

الدىمەن بالا تۋعان كەزدە بەرىلەتىن ءبىر رەتتىك مەملەكەتتىك جاردەماقى تولەنەدى:

• ءبىرىنشى، ەكىنشى جانە ءۇشىنشى بالاعا – 164 مىڭ تەڭگە؛

• ءتورتىنشى جانە ودان كەيىنگى بالالارعا – 272 مىڭ تەڭگە.

سونىمەن قاتار بالا ءبىر جارىم جاسقا تولعانعا دەيىن اي سايىنعى كۇتىم جاردەماقىسى تولەنەدى. جۇمىس ىستەمەيتىن انالار ءۇشىن ونىڭ مولشەرى:

• ءبىرىنشى بالاعا – 24 مىڭ تەڭگە؛

• ەكىنشى بالاعا – 29 مىڭ تەڭگە؛

• ءۇشىنشى بالاعا – 33 مىڭ تەڭگە؛

• ءتورتىنشى جانە ودان كەيىنگى بالالارعا – 38 مىڭ تەڭگە.

ال رەسمي جۇمىس ىستەيتىن ايەلدەرگە مەملەكەتتىك الەۋمەتتىك ساقتاندىرۋ قورىنان جۇكتىلىك پەن بوسانۋعا بايلانىستى تولەم جاسالادى. ونىڭ مولشەرى سوڭعى 12 ايداعى ورتاشا تابىسقا بايلانىستى ەسەپتەلەدى.

بۇدان كەيىن بالا كۇتىمىنە بايلانىستى تابىسىنان ايىرىلعانى ءۇشىن تولەنەتىن الەۋمەتتىك تولەم بەرىلەدى. ونىڭ كولەمى سوڭعى ەكى جىلداعى ورتاشا تابىستىڭ 40 پايىزىنا تەڭ.

ەسەپ بويىنشا:

• جۇمىس ىستەمەيتىن ايەل ءبىرىنشى بالانى دۇنيەگە اكەلگەندە شامامەن 596 مىڭ تەڭگە الادى؛

• ەگەر ايەلدىڭ جالاقىسى 250 مىڭ تەڭگە بولسا، ول جۇكتىلىككە دەيىنگى تابىسىن ەسەپتەگەندە شامامەن 1،96 ملن تەڭگە تولەم الا الادى. جالاقى جوعارى بولعان سايىن جاردەماقى كولەمى دە وسەدى.

«ۇلتتىق قور – بالالارعا» باعدارلاماسى

قازاقستاندا بالالارعا ارنالعان تاعى ءبىر ماڭىزدى باستاما – «ۇلتتىق قور – بالالارعا» باعدارلاماسى.

ءۇش جىل ىشىندە باعدارلاما بويىنشا بالالاردىڭ شوتتارىنا 2،5 ملرد دوللاردان استام قارجى ەسەپتەلگەن. تەك 2024 جانە 2025 جىلدارى ءار بالانىڭ ەسەپشوتىنا 230 دوللاردان استام قاراجات اۋدارىلدى.